समाचारहरू

भूमे गाउँपालिका–९ को चुन्बाङ स्वास्थ्य चौकी अन्तर्गतका सुत्केरी महिलाले सात महिनादेखि  प्रसूति प्रोत्साहन भत्ता नपाएको गुनासो गरेका छन्  । राज्यले स्वास्थ्य संस्थामा सुरक्षित प्रसूति  गराए वापत  तत्काल आमा र बच्चालाई दिने प्रोत्साहन रकम पाउन सकेका छैनन्  ।

उक्त स्वास्थ्य चौकीमा साउन महिनादेखि २३ जना महिलाहरूले प्रसूति भत्ता वापतको रकम पाएका छैनन् । स्वास्थ्य संस्थामा सुत्केरीको संख्या वृद्धि गर्ने, बच्चा तथा आमाको सुरक्षामा सहयोग पुगोस् भन्ने उद्देश्यका साथ राज्यले दिने गरेको सुत्केरी प्रोत्साहन भत्ता नपाएको भूमे गाउँपालिका–९ की दिलकुमारी खड्काले बताउनु भयो ।  ‘सुत्केरी भएको सात महिना बित्यो तर प्रसूति प्रोत्साहन भत्ता पाएको छैन ।’ उहाँले भन्नु भयो ।

‘प्रोत्साहन भत्ता समयमा पाएको भए सुत्केरी अवस्थामा पोषिलो खाने कुरा खान सहज हुन्थ्यो होला’ खड्काले दुखेसो पोख्दै भन्नुभयो–‘चालू आर्थिक वर्षको दोस्रो चौमासिक बित्न लाग्दा पनि सुत्केरी हुने बित्तिकै तत्काल पाउनु पर्ने प्रसूति प्रोत्साहन भत्ता खै के कारणले हामीले अहिले सम्म पाएका छैनौँ । महिला स्वास्थ्य स्वयंम सेविका कविता पुनले प्रोहत्सान भत्ताका लागि भएपनि स्वास्थ्य संस्थामा नियमित चेकजाच गर्न आउने महिलाहरू निराश भएको बताउनु भयो ।

संघीय सरकारको सशर्त बजेटले नियमित स्वास्थ्य चेकजाँच गरे बापतको ८ सय रूपियाँ र स्वास्थ्य संस्थामा सुरक्षित सुत्केरी भए बापत्को यातायात खर्च २ हजार रूपियाँ गरी जनही जम्मा २ हजार ८ सय रूपियाँ पाउने गरेका छन् । संघीय सरकारले दिने गरेको प्रोत्साहन भत्ता तथा यातायात खर्चसँगै गाउँपालिकाले थप न्यानो झोला र पोषण झोला नाममा नगद १ हजार २ सय रूपियाँ बराबरको पोषण सामाग्री उपलब्ध गर्दै आएको गाउँपालिकाले जनाएको छ । पोषण झोलामा सुत्केरीले दैनिक खानु पर्ने आवश्यक सामाग्री रहेको छ ।

गाउँपालिकाका स्वास्थ्य संयोजक उपेन्द्र यादवका अनुसार  स्वास्थ्य चौकीका इन्चार्ज समायोजन रोजेर अन्यन्त्र गएका कारण  लामो समयसम्म उक्त चौकी इन्चार्ज विहीन भयो । अबको केही दिनमै गाउँपालिकाले स्वास्थ्यको खातामा रकम  निकासा गरेर उक्त रकम वितरण गरिने संयोजक यादवले जानकारी दिनुभयो । नेपाल सरकारले मातृ मृत्यु दर र बाल मृत्यु दर घटाउन सुरक्षित मातृत्व कार्यक्रम अन्तर्गत सुत्केरी प्रोत्साहन भत्ता प्रदान गर्दै आएको छ ।

जयमान बुढा मगर