समाचारहरू

धनकुटा नगरपालिकाका मेयर चिन्तन तामाङलाई सामाजिक सञ्जालमा गालीगलौज गरेको आरोपमा प्रहरीले धनकुटा नगरपालिका-५ कर्मीटारका ४५ वर्षीय सुजन भाइ जोशीलाई भदौ १८ गते गिरफ्तार गरेको छ ।

धनकुटा खानेपानी तथा सरसफाइ समितिका संयोजक समेत रहेका तामाङलाई जोशीले खानेपानी उपलब्ध गराउन नसकेको भन्दै अश्लिल शब्द प्रयोग गरेर धनकुटा बजारमा शव गाड्ने भन्दै सामाजिक सञ्जाल फेसबुकमा गाली गलौज गरेको आरोपमा प्रहरीले जोशीलाई गिरफ्तार गरेको हो ।

धनकुटा नगरपालिका मेयर तामाङ र नेकपा एमाले धनकुटा नगर अध्यक्ष तथा धनकुटा खानेपानी तथा सरसफाइ समितिका सचिव अर्जुन छाराहाङले ०८१ भदौ ११ गते दिएको उजुरीको आधारमा आरोपितलाई प्रहरीले गिरफ्तार गरेको हो ।

आरोपित जोशीले ०८१ भदौ ६ गते अश्लिलशब्द सहितको पोष्ट गरेको प्रहरीले जनाएको छ । जोशीले भदौ ७ गते विहान अश्लिल शब्द हटाएर पोष्टलाई सम्पादन गरेको प्रहरीको भनाइ छ ।

आरोपितविरुद्ध विद्युतीय कारोबार ऐन, २०६३ अन्तर्गतको कसुरमा मुद्दा दर्ता गर्ने तयारी सहित अनुसन्धान भइरहेको एसपी श्यामसिंह चौधरीले बताउनु भयो ।

गिरफ्तारमा परेका जोशी नेकपा एस धनकुटा नगर कमिटी अध्यक्ष तथा जिल्ला पार्टी कार्यालय सचिव भएको प्रहरीको भनाइ छ ।

ईश्वर थापा