समाचारहरू

साइपाल गाउँपालिकामा खाद्यान्नको अभाव सृजना भएपछि त्यस क्षेत्रका स्थानीयहरुले सास्ती खेप्नु परेको छ ।

सदरमुकाम चैनपुरबाट तीन दिनको पैदल दुरीमा रहेको साइपाल गाउँपालिकामा हरेक वर्षको वर्षायाम र हिउँदको समयमा बाटो बन्द हुँदा खाद्यान्नको चरम अभाव सृजना हुने गरेको हो ।

यसपटक पनि वर्षायाम सुरु भएसँगै सदरमुकाम चैनपुरबाट लिएको चामल तलकोट गाउँपालिकाको पनाल्त र कँुवा गोदाममा कँुहिने अवस्थामा छ । साइपाल गाउँपालिकामा भोकमरी हुने अवस्था सृजना भएको छ । साइपाल गाउँपालिकाको काँडामा रहेको डिपो कार्यालयमा रहेको सबै खाद्यान्न वितरण भएपछि एक महिनादेखि साइपालमा खाद्यान्न अभाव भएको हो । गाउँपालिकाको वडा नम्बर ३, ४ र ५ का काँडा, बलौडी, न्यूना र धुलीलगायतका ठाउँमा खाद्यान्य समस्या रहेको छ ।

चीनसँग सीमा जोडिएको जिल्लाको दुर्गम साइपाल गाउँपालिकामा खाद्यान्न अभाव भएपछि किनेर समेत खाद्यान्न नपाउने अवस्था सृजना भएको साइपाल गाउँपालिका–४ का ढोक्कल बोहराले गुनासो गर्नु भयो ।

हिमाली भेग भएकाले खाद्यान्न उत्पादन समेत न्यून मात्रामा हुने र यातायात सञ्जालसँग नजोडिएकाले साइपाल गाउँपालिकामा वर्षेनी खाद्यान्न अभाव हुनेगरेको छ  ।

चामल सकिएकाले कोदो, जौं, गहुँको रोटी मात्रै खानु पर्ने बाध्यता रहेको वडा नम्बर ३ का स्थानीय जंगबीर बोहराले बताउनु भयो ।

उहाँले भन्नु भयो– ‘साइपालमा खाद्यान्न न्यून मात्रामा उत्पादन हुन्छ । उत्पादन भएको खाद्यान्न ६ महिना पनि खान पुग्दैन । सरकारले खाद्यान्य धुवानीका लागि ठेकेदारलाई समयमै ठेक्का दिदैन् । ठेकेदारले समयमै ढुवानी नगर्दा जहिल्यै पनि खाद्यान्य समस्या भइरहेको छ ।’

पनाल्तमै कुहिन थाल्यो चामल

गत आर्थिक वर्षमा सरकारले ढुवानी अनुदान दिएको २ हजार ५ सय कुण्टेल मध्येको ३० कुण्टेल चामल गरेर ४ सय ३० कुण्टेल चामल अझै तल्कोट गाउँपालिकाको पनाल्तस्थित गाईबस्तुलाई घाँस राख्ने ठाउँमा अलपत्र  फालिएकोले कुहिने अवस्थामा रहेको स्थानीयको आरोप छ ।

गाउँमा भोकमारी हुने अवस्था रहेको र यता बिच बाटोमा अलपत्र फालिएको चामल कुहिँन थालेको स्थानीय शेरबहादुर बोहराले बताउनु भयो ।

स्थानीय सरकारले खच्चडवालालाई दुवानी भाडा बढाएर नदिएको र ठेकेदारले खच्चडवालालाई न्यून भाडामा ढुवानी गराउन खोज्दा खाद्यान्नको अभाव सृजना भएको उहाँले बताउनु भयो ।

चामल ढुवानीको जिम्मेवारी पाएको जाल्पादेवी सप्लायर्सका प्रतिनिधि देवराज जोशीले ढुवानीका लागि प्रयोग गरिने खच्चड अभावका कारण समयमै चामल ढुवानी गर्न नसकिएको बताउनु भयो ।

गत वर्षको ३० कुण्टेल र गाउँपालिकाले खरिद गरेको चामल बिचबाटो पनाल्तमा भण्डारण गरिएको र चामल ढुवानी गर्न खच्चडको व्यवस्थापन गर्ने कार्य भइरहेको उहाँले बताउनु भयो ।

स्थानीयको विरोधपछि ठेकेदारले अव्यवस्थित रुपमा राखिएको चामलको भण्डारणमा केही सुभार गरेका भए पनि ढुवानी गर्न अझैं दुई साता लाग्ने साइपाल गाउँपालिका अध्यक्ष मानबहादुर बोहराले बताउनु भयो ।

साइपालमा भइरहने खाद्यान्न अभाव टार्न खाद्य कम्पनीको स्थायी डिपो साइपाल गाउँपालिकामा नै सञ्चालन गर्न संघीय र प्रदेश सरकारलाई पटकपटक अनुरोध गरिएको भए पनि संघीय र प्रदेश सरकारले समस्या समाधानतर्फ चासो नदिएका कारण वर्षेनी खाद्यान्न समस्या हने गरेको गाउँपालिकाका अध्यक्ष बोहराको भनाइ छ ।

सत्यराज सिंह