समाचारहरू

सहुलियत दरमा खाद्य संस्थानको श्रीकोट डिपोबाट सर्वसाधारणलाई विक्री गरिने खाद्यन्न ढुवानीको जिम्मा लिएका ठेकेदारले खत्याड भेगका सात गाविसका सर्वसाधारणलाई २० रुपियाँ बढीमा विक्री गरेको पाइएको छ ।

खप्त्याड भेगको सेरी, श्रीकोट, खमाले, गम्था, कोटडाँडा, सुकाढिक र हृयाँग्लु गाविसका स्थानीयवासीलाई संस्थानले विक्री गर्दै आएको खाद्यन्नको मुल्य भन्दा २० रुपियाँ बढी जोडेर खाद्यन्न विक्री गरिएको हो ।

सुर्खेतदेखि श्रीकोटसम्म खाद्यन्न ढुवानीको जिम्मा पाएको माँ दुर्गा जनरल अडर एण्ड सप्लायर्स सुर्खेतका प्रतिनिधि र्सजन बुढाले ९ सय ८० रुपियाँ पर्ने उसिना मोटा चामलको प्रति प्याकमा २० रुपियाँ थपेर एक हजारमा बेच्ने गरेको स्थानीयबासीले आरोप लगाएका छन् ।

संस्थानले ३० केजीको प्याकलाई ९ सय ६० र बोराको २० रुपियाँ जोडेर ९ सय ८० रुपियाँमा खाद्यन्न विक्री गर्दै आए पनि श्रीकोट डिपोमा ठेकेदारले थप २० रुपियाँ अतिरिक्त मुल्यमा बेच्दै आएको छ । अहिलेसम्म ठेकेदारले १ हजार १ सय ८० प्याक चामल १ हजारका दरले विक्री गरेको र आफूले पनि त्यहि मुल्यमा दुई प्याक चामल किनेको श्रीकोट गाविस-१ का डिलबहादुर बानियाले जानकारी दिए ।

ठेकेदार पक्षका प्रतिनिधिले संस्थानको मुल्य भन्दा बढी मुल्यमा खाद्यन्न बेचेको पाइएमा कानुन बमोजिम आवश्यक प्रक्रिया थालिने नेपाल खाद्य संस्थान मुगु शाखाका शाखा प्रमुख गङ्गाप्रसाद साहले जानकारी दिए ।

संस्थानले चालु आर्थिक वर्षा लागि खत्याड भेगका सात गाविसका स्थानीय सर्वसाधारणले श्रीकोट डिपोबाट पाउने गरी १ हजार ५ सय क्वीण्टल कोटा निर्धारण गरेको भए पनि अहिले थप २ हजार क्वीण्टल थपेर ३ हजार ५ सय क्वीण्टल खाद्यन्न वितरण गर्ने जनाएको छ । ठेकेदारले ३० केजीका प्रति प्याकमा २० थपेर लिँदा ३ हजार ५ सय क्वीण्टलको २ लाख १० हजार रकम बढी लिने देखिन्छ ।

जीवन सेजुवाल