समाचारहरू

नेपालीहरूको महान पर्व दसैँमा सहुलियतको चामल नआएपछि महङ्गोमा किन्न बाध्य भएको स्थानीयबासीले गुनासो गरेका छन् ।

डाडाँफया गाविस-८ का ४९ वर्षीय ध्वजबहादुर सिंहले सहुलियतको चामल नआएपछि २५ किलोको चामललाई ४ हजार ५ सय रुपियाँमा किन्नु परेको गुनासो गरे । सिंहका अनुसार सहुलियतको २५ किलो चामललाई १ हजार ३ सय ८० रुपियाँमा पाइन्थ्यो ।

खाद्य संस्थानले प्रत्येक वर्षदसैँका लागि सहुलियतमा खाद्यान्न वितरण गर्ने गरेको भएपनि यस वर्षसमयमा खाद्यान्न ढुवानी नगरेका कारण खाद्यान्नको समस्या बढेको डाडाँफया गाविस-८ की ३२ वर्षीया पाइकी सिंहले बताइन् ।

संस्थानले चामल, नुनलगायतका खाद्यान्न ढुवानी भइसकेको बताएपनि खाद्य डिपोमा असोज २८ गतेसम्म खाद्यान्न नपुगेको स्थानीयबासी ध्वजबहादुर सिंह बताउँछन् । जिल्ला खाद्य व्यवस्थापन समितिले यस आर्थिक वर्षको चामल ढुवानीका लागि चासो नदेखाएका कारण खाद्यान्न ढुवानीमा ढिलाइ भएको नेपाल खाद्य संस्थान हुम्लाका प्रमुख नारायणसिंह केसीले बताए ।

निमित्त प्रमुख जिल्ला अधिकारी रिदीप्रकाश सिटौलाले आफू जिल्लामा केही दिनअघि मात्र आएकोले यस समस्याका बारेमा जानकारी नभएको बताउँदै थप जानकारी लिई समस्या समाधानका लागि पहल गर्ने बताए ।

जिल्लामा भएको उत्पादनले तीन महिनापनि राम्रोसँग खान नपुग्ने भएपछि बाँकी नौ महिना संस्थानको चामलको भर पर्नुपर्ने स्थानीयबासीले गुनासो गरे ।

नन्द सिंह