सहकर्मीमाथि हातपात घटनाका आरोपित गिरफ्तार

सप्तरी, कञ्चनरूप नगरपालिका–८ स्थायी घर भइ खाँदबारी नगरपालिका–१ स्थित जिल्ला अस्पतालमा फार्मेसी इञ्चार्जमा कार्यरत २८ वर्षीय धिरज रौनियार र धर्मदेवी नगरपालिका–९ का ३९ वर्षीय सूचना अधिकारी शेखर खत्रीलाई भदौ २८ गते हातपात गरेको आरोपमा प्रहरीले अस्पताल प्रशासन प्रमुख दिपेश श्रेष्ठलाई भदौ २९ गते गिरफ्तार गरेको छ ।

धर्मदेवी नगरपालिका–९ का ४२ वर्षीय श्रेष्ठले भदौ २८ गते फार्मेसी इञ्चार्ज र सूचना अधिकारीलाई हातपात गरेको आरोपमा पीडित पक्षले आरोपितविरूद्ध भदौ २८ गते जिल्ला प्रहरी कार्यालयमा उजुरी दिएको थियो ।

पीडित पक्षको उजुरीका आधारमा आरोपितलाई अनुसन्धानका लागि गिरफ्तार गरेको जिल्ला प्रहरी कार्यालयका डिएसपी वीरेन्द्र गोदारले बताउनु भयो ।

आरोपितले बिनाकारण कुटपिट गरेको पीडित धिरज रौनियारले इन्सेक प्रतिनिधिसँगको भेटमा बताउनु भयो । अस्पताल प्रशासन प्रमुख श्रेष्ठले के कति कारणले आफूहरूलाई कुटपिट गरेको हो सो थाहा नपाएको रौनियारले इन्सेक प्रतिनिधिसँग बताउनु भयो ।

भदौ २८ गते साँझ साढे ७ बजे अस्पतालकै क्वाटरमा बसिरहेको अवस्थामा अस्पतालका प्रशासन प्रमुख श्रेष्ठले कुटपिट गरेको पीडित पक्षको आरोप छ ।

अस्पताल व्यवस्थापन प्रमुख सुमन शाक्यले घटनाका विषयमा जानकारी आएको तर विस्तृत रूपमा बुझन् बाँकी रहेको बताउनु भयो ।

आरोपितलाई गिरफ्तार गरी अनुसन्धान थालिएको डिएसपी वीरेन्द्र गोदारको भनाइ छ ।


भविन कार्की