समाचारहरू

चन्दननाथ नपा-९ बयालकाटियागाउँका स्थानीयबासी र सशस्त्र प्रहरीको झडपमा १२ जना स्थानीयबासी घाइते भएका छन् भने चार जना प्रहरी घाइते भएका छन् ।

चन्दननाथ नपा-९ का वयालकाटियागाउँ र तलिउम गाउँबिच शम्भुनाथ पारिपाल्त भन्ने सामुदायिक वनको विषयमा वैशाख ११ गते विवाद भएपछि न्यायका लागि प्रशासन कार्यालय आउँदा सशस्त्र प्रहरीले एक्कासी लाठी चार्ज गरेको देव गिरीले आरोप लगाए ।

उनले भने-'प्रशासनमा न्यायका लागि आएका हौँ । प्रहरीको कुटाई खान आएका होइनौँ ।' घाइते हुनेहरूमा चन्दननाथ नपा-९ का सुरेन्द्र गिरी, बिर्ख गिरी, चैती गिरी, दुर्गा गिरी, जनतारा गिरी, चक्र गिरी, कला गिरी, विष्णु गिरी, एकमाया गिरी, मन्नु गिरी, सुरेन्द्र गिरी र चन्द्र गिरी रहेका छन् । घाइतेको टाउको, ढाड, तिघ्रा र अनुहारमा चोट लागेको छ ।

'पहिलादेखि हामीले उपभोग गर्दै आएको वन सोही वडाका तलिउमगाउँका स्थानीयले सामुदायिक वन बनाएर पछि दुई गाउँबिच विवाद हुन थालेको हो ।'-स्थानीय चैती गिरीले बताइन् ।

त्यसैगरी प्रहरीतर्फ जिल्ला प्रहरी कार्यालयमा कार्यरत प्रहरी हवल्दार हिक्मत थापा, प्रहरी जवान सिद्धबहादर बोहोरा, यज्ञ बहादुर कार्की र अङ्शुकुमार चौधरी घाइते भएका छन् । उनीहरूको टाउको र तिघ्रामा चोट लागेको छ । प्रहरी हवल्दार थापाले भने-'वनको विषयमा आन्दोलन गर्दै आएका आन्दोलनकारीलाई सम्झाउदै चार/पाँच जनाको समूह बनाएर प्रमुख जिल्ला अधिकारीसँग छलफलको लागि जानुहोस भन्दै थियौँ । आन्दोलनकारी तर्फका एक/दुई जनाले बढी हल्ला गरेपछि सशस्त्र प्रहरीले भीड नियन्त्रणका लागि लाठी चार्ज गर्नुपरेको हो ।'

घाइते स्थानीय र प्रहरीको कर्णाली स्वास्थ्य विज्ञान प्रतिष्ठान शिक्षण अस्पताल जुम्लामा उपचार भइरहेको छ । प्रमुख जिल्ला अधिकारी नारायणप्रसाद सापकोटाले स्थानीयले नारा जुलुशमा प्रयोग गरेका प्लेकार्डले प्रहरीलाई प्रहार गर्न थालेपछि दङ्गा भड्किएको प्रतिक्रिया दिए । आन्दोलनकारी जबरजस्ती प्रशासन कार्यालयको ढोका भित्र प्रवेश गर्न खोज्दा प्रहरीले नियन्त्रणमा लिन खोजेको उनको भनाइ छ ।

मानदत्त रावल