समाचारहरू

जिल्लाको सिमावर्ती क्षेत्र सुस्ता नाकामा स्थानीय र प्रहरीबिच भएको विवाद  पछि सशस्त्र प्रहरीको  गोली प्रहारबाट प्रतापपुर गाँउपालिका – ६ कठहवाका २२ वर्षीय अविनाश राजभरको जेठ ५ गते मृत्यु भएको छ ।

अविनाश सुस्ता गाउँपालिका–५ बनकट्टी नाकाबाट नेपाल तर्फ प्रवेश गर्ने क्रममा सिमामा खटिएका सशस्त्र प्रहरीसँग विवाद भएको थियो । विवाद पछि आक्रोशित भएका स्थानीयहरूले ढुङ्गा मुढा गर्न थालेपछि स्थितिलाई नियन्त्रणमा लिन गोली चलाउनु परेको सशस्त्र प्रहरी बल २६ नम्बर गणका एसपी महेश अधिकारीले जानकारी दिनुभयो । झडपलाई अन्य कुनै प्रयासबाट रोक्न नसकिएपछि स्थितिलाई नियन्त्रणमा लिन गोली चलाउनु परेको प्रमुख जिल्ला अधिकारी धर्मेन्द्रकुमार मिश्रले बताउनु भयो ।

कोभिड महामारीको समय भएकाले सिमाबाट आउजाउ गर्न कडाई गरिएको प्रशासन कार्यालयले जनाएको छ । स्थानीयहरूका अनुसार प्रहरीले भारतबाट आउने क्रममा युवाहरुलाई बिनाकारण कुटपिट गरेको बताएका छन् ।

घाइतेको स्थानीय अस्पतालमा उपचार हुन नसकेपछि बुटवल लैजादै गर्दा  बाटोमा मृत्यु भएको प्रहरी प्रहरीले जनायो । मधेश स्वतन्त्र समूहका संयोजक राधेरमण पाण्डेले विज्ञप्ती मार्फत प्रहरीले हत्या गरेको भन्दै शहिद घोषणाको माग गरेका छन् । मृतकपक्षले शव नबुझ्ने अडान राखेपछि शवको पोष्टमार्टम हुन सकेको छैन ।

नारायण पराजुली