समाचारहरू

उच्च अदालत पाटनको हेटौँडा इजलासले सशस्त्र द्वन्द्वको समयमा चितवनको बकुल्लहर चोकमा मारिएका गोरखा फुजेलका कृष्णप्रसाद अधिकारीको हत्याका आरोपितलाई चैत २९ गते सफाइ दिएको छ ।

आफ्ना छोरा कृष्णप्रसादको हत्या गरेको आरोपमा कारबाहीको माग राखी गोरखा फुजेल निवासी छविलाल पौडेलसहित १२ जनाविरुद्ध बुबा नन्दप्रसाद र दाजु नुरप्रसाद अधिकारीले चितवन जिल्ला अदालतमा उजुरी दिएका थिए ।

सोही उजुरीका आधारमा प्रहरीले लगाएको मुद्दामा जिल्ला अदालत चितवनले ०७५ भदौ २४ गते मुद्दाको सुनुवाइ गर्दै आरोपितहरूले अधिकारीको हत्या गरेको भन्ने प्रमाण नपुगेको भन्दै सफाइ दिने फैसला गरेको थियो ।

जिल्ला अदालतको आदेश बदर गर्दै आरोपितलाई कारबाहीको माग गरी जिल्ला सरकारी वकिलमार्फत पीडित पक्षले उच्च अदालत पाटनमा पुनरावेदन गरेको थियो ।

उच्च अदालत पाटन हेटौँडा इजलासले सरकारी साक्षी नबुझी कर्तब्यज्यान मुद्दाको फैसला गरेको भन्दै ०७७ फागुन २ गते पाँच जना साक्षी बकपत्रका लागि झिकाउने आदेश गरेको थियो ।

न्यायाधीश शेषराज शिवाकोटी र चण्डीराज ढकालको इजलासले साक्षीहरू गौरीमाया अधिकारी, रुपा रेग्मी, लोकनाथ दाहाल, ठाकुरप्रसाद अधिकारी, तत्कालीन डिएसपी सञ्जय राउत र सई बुद्धी चौधरीलाई बकपत्रका लागि चैत १ गतेको इजालसको लागि झिकाउने आदेश गरेको भए पनि दुई जना साक्षी मात्र उपस्थित भएका थिए ।

चैत २८ गतेको इजालसमा अधिकारीका  तर्फबाट सहन्यायधिवक्ता सन्देश श्रेष्ठ, उपन्यायाधीवक्ता सुरेन्द्र काफ्ले, अधिवक्ता पुष्प पौडेललगायतले बहस गर्नु भएको थियो भने विपक्षीको तर्फबाट वरिष्ठ अधिवक्ताहरू मुक्ति प्रधान, रमण श्रेष्ठलगायतले बहस गर्नु भएको थियो ।

हेटौँडा इजलासका न्यायाधीश चण्डीराज ढकाल र मेरिना श्रेष्ठको इजलासले चितवन जिल्ला अदालतकै फैसला सदर गरेको उच्च सरकारी वकिल कार्यालय हेटौँडाका प्रमुख तथा सहन्यायाधीवक्ता सन्देश श्रेष्ठले बताउनु भयो ।

घटनाका आरोपितहरू गोरखा फुजेल निवासी छविलाल पौडेल, जानुका पौडेल, भीमसेन भनिने भीष्मराज पौडेल, मेघनाथ पौडेल, रामप्रसाद अधिकारी, अजीव भनिने परशुराम पौडेल, हिमलाल अधिकारी, विष्णु तिवारी, कालीप्रसाद अधिकारी, रामप्रसाद अधिकारी, सीता अधिकारी र सुभद्रा तिवारीले सफाइ पाएका हुन् ।

आफ्नो छोराको हत्यामा संलग्नलाई कारबाहीको दायरामा ल्याई न्याय प्राप्तको आन्दोलनमा लागेका अधिकारी दम्पतिमध्ये पतिको निधन भइसके पनि गङ्गामाया न्यायको लागि सङ्घर्ष गरिरहनु भएको छ ।

पछिल्लो समय उहाँ आफ्नो छोराका हत्यारालाई कारबाहीको माग गर्दै ०७७ पुस ६ गतेदेखि काठमाडौँको वीर अस्पतालमा अनशनरत हुनुहन्छ ।

गङ्गामायाले छोराका हत्यामा संलग्नलाई कारबाही नहुन्जेल आफ्ना पतिको दाहसंस्कार नगर्ने भनेपछि नन्दप्रसादको शव अहिले पनि शिक्षण अस्पताल महाराजगन्जमा छ ।

 

पुष्पराज अधिकारी