समाचारहरू

व्यवस्थापिका संसद्को सुनुवाइ समितिको माघ १७ गते बसेको बैठकले मुख्य न्यायाधीशहरू तेजबहादुर केसी र पुरुषोत्तम भण्डारीलाई सर्वोच्च अदालतको न्यायाधीश पदका लागि अनुमोदन गरेको छ ।

न्यापरिषद्को पुस १८ गतेको बैठकले न्यायाधीश केसी र भण्डारीलाई सर्वोच्चको न्यायाधीश पदमा सिफारिस गर्दै सुनुवाइका लागि संसद सचिवालयमा पठाएको थियो । संसदीय सुनुवाइको क्रममा दुवै न्यायाधीशले न्यायलयमा हुने गरेका विकृति निराकरण गर्दै न्याय सम्पादनलाई दु्रत गतिमा अघि बढाउने प्रतिबद्धता व्यक्त गरेका छन् ।

संसद सचिवालयबाट अनुमोदित भएकालाई राष्ट्रपतिले नियुक्त गर्ने व्यवस्था छ । अनुमोदित भएका केसी विराटनगर र भण्डारी पोखरा उच्च अदालतको मुख्य न्यायाधीशका रूपमा कार्यरत छन् । सर्वोच्च अदालतमा प्रधान न्यायाधीशसहित २१ जना न्यायाधीश रहने व्यवस्था छ । केसी र भण्डारीको नियुक्ति पछि सर्वोच्च अदालतमा प्रधान न्यायाधीशसहित २० जना न्यायाधीश पुग्ने छन् ।

विवेक ढुङ्गाना