समाचारहरू

राष्ट्रिय मानव अधिकार आयोगका पूर्वाञ्चल क्षेत्रीय कार्यालयका निर्देशक झङ्करबहादुर रावलले देशमा ठूला राजनीतिक परिवर्तन भएपनि सर्वसाधारणले मानव अधिकार अनुभूत गर्न नपाएको बताएका छन् । उनले मानव अधिकार संरक्षणका नाममा करोडौँ रुपियाँ खर्च गरेपनि अधिकार हनन्का घटनामा पूर्ण रूपले कमी आउन नसकेको बताए ।

आयोगले मङ्सिर २० गते इलाममा आयोजना गरेको आप्रवासी कामदारको अवस्था विषयक अन्तरक्रियामा रावलले बेरोजगार भएका कारणले गाउँघरबाट युवाहरू विदेशिनुपर्ने समस्या रहेको र विदेशमा पनि उनीहरू समस्यामा पर्ने गरेको बताए ।

'भौतिक संरचना र विकास निर्माणका साथै समाजमा एकअर्कामा सकारात्मक व्यवहार गर्दै मानव अधिकारमुखी कार्यक्रम गर्दा समाजको विकास छिटो हुन सक्छ ।'-रावलले भने-'मानव अधिकार उल्लङ्घनका घटना हुने कारण नै सार्वजनिक जवाफदेहिता कार्यान्वयन नगर्नु हो ।'

कार्यक्रमका सहभागीले सार्वजनिक सवारी साधनमा यात्रा गर्दासमेत महिला र अन्य यात्रुमाथि  अशोभनीय र निन्दनीय व्यवहार भइरहेको बताए । श्रमिकको संस्था जिफन्टका प्रतिनिधि नारायणप्रसाद अधिकारीले इलाम भित्रै रहेका श्रमिकहरूको अधिकारको विषयमा कसैले सरकारले नसोचेको गुनासो गरे । अहिले इलाममा भएका सरकारी स्वामित्वका चिया बगानमा कार्यरत श्रमिकहरूले नेपाल सरकारले तोकेको दैनिक ज्याला पनि नपाएको अधिकारीले जानकारी दिए ।

कार्यक्रममा उनीहरूले नगरपालिकाको खानेपानी प्रदूषित भएको, थोरै पानी दिएर धेरै रकम तिर्नुपरेको तर नगरपालिकाले त्यसको सुनुवाइ नगरेको, वैदेशिक रोजगारीपछि समाजमा आएको विकृति विकराल बनिरहेकोलगायतका समस्या सहभागीले राखेका थिए । कार्यक्रममा जिल्लास्थित सरकारी तथा गैरसरकारी कार्यालयका प्रमुख र प्रतिनिधि, नागरिक समाजका अगुवा, आप्रवासी मजदुरहरूलगायतको सहभागिता थियो ।

कोकिला ढकाल