समाचारहरू

सामान्य भनाभन हुँदा गल्कोट नगरपालिका–६ हरिचौरका ४० वर्षीय सोमबहादुर बस्नेतलाई कुटपिट गरेको आरोप लागेका दुई जना प्रहरी जवानलाई जिल्ला प्रहरी कार्यालय, बागलुङले निलम्बन गरेको जनाएको छ ।

गत पुस २९ गते इलाका प्रहरी कार्यालय, हरिचौरमा कार्यरत प्रहरी जवानद्वय ३५ वर्षीय प्रेमसिंह विष्ट र ३० वर्षीय बुद्ध थापाले बस्नेतलाई अनुचित बल प्रयोग गरी कुटपिट गरेको पाइएपछि विभागीय कारवाही अनुरूप दुवैजनालाई निलम्बन गरिएको जिल्ला प्रहरी कार्यालय, बागलुङका एसपी दिपक रेग्मीले बताए ।

ड्युटीमा खटिएका प्रहरीले सर्वसाधारणको सुरक्षा गर्नुपर्ने ठाउँमा सामान्य विषयमा बल प्रयोग गरेको पाइएपछि माघ ७ गते विभागीय कारवाही अनुसार उनीरूलाई निलम्बन गरिएको रेग्मीले बताए ।

हाल दुवै प्रहरी जवानलाई इलाका प्रहरी कार्यालय, हरिचौरले नियन्त्रणमा लिएर अनुसन्धान गरिरहेको समेत एसपी रेग्मीले जानकारी दिए ।

कुटपिटबाट गम्भीर घाइते भएका बस्नेतको उपचार पुस ३० गतेबाट पोखरास्थित फेवासिटी अस्पतालमा भइरहेको छ । बस्नेतको उपचार खर्च कुटपिटमा संलग्न प्रहरी जवानद्वयले भरिरहेको एसपी रेग्मीले बताए ।

सिर्जना पन्त