समाचारहरू

सर्लाहीको बरहथवा गाउँपालिका-६ निवासी चौपाया ब्यपारी पुकार यादवको सात वर्षीय छोरा राकेश यादवलाई भारतीय नम्बर प्लेटको मोटर साइकल चढेर आएका दुई जनाले अपहरण गरी बेपत्ता बनाएका छन् ।

जेठ १५ गते सोमबार साँझ घर अगाडि खेलिरहेका बालकलाई अपहरण गरी बेपत्ता बनाएको इलाका प्रहरी कार्यालय बरहथवाका इन्स्पेक्टर ललनप्रसाद कुर्मीले बताए । पीडित परिवारले घटनाको बारेमा सोही दिन जानकारी गराएपछि खोजी कार्य सुरू गरिएको इन्स्पेक्टर कुर्मीले जानकारी दिए ।

घर अगाडि खेलिरहेका बालकलाई मोटरसाइकलमा जबरजस्ती राखेर लगेको स्थानीयले देखेका थिए । अपहरणको कारण खुल्न नसकेको इलाका प्रहरी कार्यालय बरहथवाले जनाएको छ । बालक अपहरणको जिम्मा र फिरौती कसैले नमागेको प्रहरीले जनाएको छ ।

बालकको खोजी गर्न रौतहट र भारतीय प्रहरीसँग समेत समन्वय गरिएको जिल्ला प्रहरी कार्यालय सर्लाहीले जनाएको छ ।

सन्तोषकुमार सिंह