समाचारहरू

बरहथवा नपा-५ हातीडण्डा निवासी सुपर भिजन बोर्डिङ्ग स्कुलका सञ्चालक ३० वर्षीय मालिक महतोलाई धारिलो हतियार प्रहार गरी हत्या गरेको अवस्थामा पुस ७ गते बिहान शव फेला परेको छ ।

धारिलो हतियारले प्रहार गरी टाउको क्षतविक्षत बनाएको महतोको शव नयाँरोड बरहथवा सडकखण्डबाट हातीडण्डा जाने बाटोमा पर्ने सोतीखोला चोरनीया पुल नजिक घोप्टो परेर लडेको अवस्थामा फेला परेको हो ।

केही साथीहरूको साझेदारीमा ढुङ्ग्रेखोला जिरायतस्थित सुपर भिजन बोर्डिङ्ग स्कुल सञ्चालन गर्दै आएको थियो ।

पुस ६ गते साँझ कसैले फोन गरेपछि पाकिसकेको खानासमेत नखाई महतो एक छिनमा आउँछु भनेर घरबाट निस्केको परिवारजनले बताए ।

परिवारिक स्रोतका अनुसार राति ९ बजे तिर फोन गर्दा "खाना पस्कँदै गर्नु म आउदैछु" भनेर जबाफ फर्काएका महतो रातभर सम्पर्कविहीन भएका थिए ।

मृतक महतोको पत्नीसहित ८ र ४ वर्षमा दुई छोरा छन् । एक्लो छोराको हत्याले मृतकका बुब, आमा र पत्नीसहित आफन्त भावविव्हल बनेका छन् ।

हत्यामा संग्लन गिरफ्तार नपरेसम्म शव उठाउन नदिने भन्दै पुस ७ गते अपरान्हसम्म पीडित परिवार र स्थानीयले विरोध गरेपछि शव घटनास्थलमै रहेको थियो ।

जिल्ला प्रहरी कार्यालय र्सलाहीका एसपी पोषराज पोखरेलले निष्पक्ष ढङ्गले अनुसन्धान गरी हत्यारा चाँडै गिरफ्तार गर्ने प्रतिबद्धता जनाएपछि शव पोष्टमार्टमका लागि जिल्ला अस्पताल मलङ्गवामा लगिएको थियो ।

हेटौडाबाट तालिम प्राप्त कुकुर ल्याएर अनुसन्धान अगाडि बढाएको र हत्यामा संग्लनहरूको पहिचान एवम् खोजी कार्यसहित घटनाबारे गम्भीर ढङ्गले अनुसन्धान भइरहेको एसपी पोखरेलले जानकारी गराए ।

उनले भने-"फोन कल डिटेलसहित अनुसन्धान प्रक्रिया अगाडि बढाइएको छ । एक दुई दिनभित्रै परिणाम आउनेमा ढुक्क छौँ ।"

पचुलाल माझी