सर्पले टोकेर छाउगोठमा बसेकी युवतीको मृत्यू

महिनावारीको समयमा सुत्ने छाउगोठमा बसेको बेला दैलेखमा सर्पले टोकेर एक युवतीको मृत्यू भएको छ । चामुण्डा बिन्द्रासैनी नगरपालिका-६ लैनचौरकी १८ वषर्ीया तुलसी शाहीको मृत्यू भएको पूर्वसभासद् जग्गेबहादुर शाहीले जानकारी दिए ।

असार २२ गते दिउँसो मामा जगत गिरीको रोपाईंबाट फर्किर्एर हाडे टोलस्थित उनकै घर नजिक छाउगोठमा अरु किशोरी साथीहरूसँगै बसिरहेको बेला राति १० बजेतिर सर्पले टोके लगत्तै राति नै जम्बुकाँध मेडिकलमा उपचार प्रयत्न गर्दागर्दै असार २३ गते उनको मृत्यू भएको पूर्वसभासद् शाहीले बताए ।

'राति सुरुमा गाउँमै झारफुक गर्न समय खर्च गरेकाले बिहान मात्र मेडिकलमा ल्याइपुर्‍याएपछि धेरै प्रयत्न गरियो । वर्षातको कारण यातायात सञ्चालन नभएकोले अन्यत्र लैजान पनि अभिभावकले नसकेकाले बचाउन नसकिएको हो ।'-मेडिकल सञ्चालक नविन खड्काले भने ।

आमा र दुई दाजुसँगै बसेकी ती युवती महिनावारी भएको बेला सधैँजसो मामाको घर नजिक बनाएको छाउगोठमा बस्ने गरेको लैनचौरकी हेमा नेपालीले जानकारी दिइन् ।

पूर्वसभासद् शाहीकी भतिजी तुलसीले अघिल्लो वर्ष नियमित एसइइ परीक्षा दिएकोमा असफल भएपछि यसपटकसमेत राम्रो ग्रेड नआएको भन्दै साउनमा हुने एसइइको मौका परीक्षा दिने तयारी गरेकी थिइन् । उनी डेढ वर्षकी छँदा जण्डिसका कारणले उनको बुबाको मृत्यू भएको थियो ।

डेढ महिनाअघि जेठ ८ गते चामुण्डा बिन्द्रासैनी नगरपालिका-४ की १४ वर्षीया लालसरा बिकको पनि छाउगोठमा ज्यान गएको थियो । जिल्ला समन्वय समितिले हालै गरेको अध्ययनले जिल्लाभर ५ सय १३ घरमा छाउगोठ रहेको उल्लेख छ ।

छाउगोठ छैनन् भनिएका गाउँमा महिनैपिच्छे छाउगोठमा महिलाहरूको ज्यान जान थालेका पछिल्ला घटनाहरूले छाउगोठ अझै बढी हुन सक्ने महिला विकास अधिकृत अनिता ज्ञवालीको भनाइ छ ।


अमर सुनार