समाचारहरू

स्वास्थ्य चौकी सर्केगाडमा सामान्य बिरामीका लागि आवश्यक पर्ने औषधि नहुँदा बिरामीहरू रित्तो हात घर फर्कन बाध्य भएका छन् ।

स्वास्थ्य चौकीमा भएको सिटामोल पनि अब सकिन लागेकाले त्यसको पनि अभाव हुने देखिएको स्थानीयबासी अज थापाले जानकारी दिए ।

'पहिला पहिला आएका बिरामीलाई अलिकति सिटामोल दिएर फर्काउने गरेको थिए । अब त्यही पनि छैन ।'-थापाले भने । आजभोलि उक्त स्वास्थ्य चौकीमा दैनिक २५ देखि ३० जना विभिन्न लक्षण भएका बिरामी उपचार गर्न आउने गरे पनि औषधि नहुँदा रित्तो हात लिएर घर फर्कने गरेको बिरामी विर्षसाउदले बताए ।

स्वास्थ्य चौकीले ४२ प्रकारका औषधि निशुल्क वितरण गर्न पाउने र चौकीमा स्टोर हुने नीति भए पनि सर्केगाड स्वास्थ्य चौकीमा भने सिटामोल पनि पाउन निक्कै गाह्रो हुने गरेको अर्का बिरामी टक्क थापाको भनाइ रहेको छ । उक्त स्वास्थ्य चौकीमा ज्वरो आउने, रूघाखोकी लाग्ने, शरीर दुख्नेलगायतका लक्षण भएका बिरामी आउने गरेको थापाले बताए ।

उक्त स्वास्थ्य चौकीमा दुई जना अहेव, दुई जना अनमी, एक जना कार्यलय सहयोगीसहित ६ जनाको दरबन्दी रहेको जिल्ला जन स्वास्थ्य कार्यलयका प्रमुख डा.स्मृती महतले बताइन् ।

महतका अनुसार दसैँ विदामा गएका इञ्चार्ज ओब्जङ् शाही अहिलेसम्म पनि सम्पर्कमा आएका छैनन् । यतिखेर एक जना मात्र अनमी भए पनि औषधि नहुँदा हाजिर लगाएर फर्कने गरेको टकक थापाले आरोप लगाएका छन् ।

जिल्ला जनस्वास्थ्य कार्यालयले भने उक्त स्वास्थ्य चौकीको अवस्थाको बारेमा कुनै पनि जानकारी नआएकोले यर्थाथ अवस्था बुझेर सोही अनुसार कार्य अगाडि बढाउने जिल्ला स्वास्थ्य कार्यालय प्रमुख महतले बताइन् ।

नन्द सिंह