समाचारहरू

भानु नगरपालिका–४ तिलाहारका ४५ वर्षीय राजु विक वैशाख २१ गते बिहान उच्च रक्तचाप सम्बन्धी समस्याबाट पीडित हुनु भयो । उहाँलाई आफन्तले तत्कालै वडा नम्बर ५ मा रहेको पुरनडिही नगर अस्पतालमा लगे । तर उक्त सरकारी अस्पतालमा स्वास्थ्यकर्मी नहुँदा बिरामीलाई नजिकैको नीजि मेडिकल हलमा लगेर उपचार गराए ।

भानु नगरपालिकाले नगर स्तरीय अस्पतालको रूपमा बिकास गरेको पुरनडिही अस्पतालमा आकस्मिक सेवा सञ्चालन नहुँदा बिरामीहरू मारमा पर्दै आएका छन् । राजु मात्र हैन, अन्य विरामीहरूले पनि सँधै यस्तै समस्या भोग्नु परेको भानु नगरपालिका–४ का राजेश पन्थले बताउनु भयो । पन्थले आकस्मिक सेवा सञ्चालनको लागि पटक पटक आग्रह गरेपनि सुनुवाई नभएको बताउनु भयो ।

भानु नगरपालिकाका स्वास्थ्य शाखाका प्रमुख ऐश्वर्यचन्द्र भट्टराईले आवश्यक जनशक्ति र उपकरण नहुँदा उक्त अस्पतालमा आकस्मिक सेवा सञ्चालन गर्न नसकिएको बताउनु भयो । उक्त अस्पतालमा एक जना एमबिबिएस डाक्टर कार्यरत रहेपनि आकस्मिक सेवा सञ्चालन नहुँदा उहाँ भानु नगरपालिका–२ को घरबाट नै १० देखी ५ बजे को कार्यालय समयमा आउने जाने गरेको भट्टराईले बताउनु भयो ।

उक्त अस्पतालमा ६ जना स्वास्थ्यकर्मी कार्यरत रहेका छन् । बर्थिङ सेन्टर पनि सञ्चालन गरिएको हुँदा दुई जना महिला स्वास्थ्यकर्मी भने अस्पतालकै निवासमा बस्ने गरेका छन् ।

भानु नगरपालिका मेयर आनन्दराज त्रिपाठीले नगरपालिकाको कार्यपालिका बैठकले उक्त अस्पतालमा आकस्मिक सेवा सञ्चालन गर्ने निर्णय गरिसकेको बताउनु भयो । तर आकस्मिक सेवाको लागि आवश्यक उपकरण, जनशक्ति र स्वास्थ्यकर्मी बस्ने निवास नभएको हुँदा आकस्मिक सेवा सञ्चालन गर्न नसकिएको उहाँको भनाई छ ।

मेयर त्रिपाठीले चाँडै नै बजेट व्यवस्था गरेर उपकरण र आवश्यक जनशक्तिको व्यवस्थापन गरिने बताउनु भयो ।

प्रकाशचन्द्र भट्टराई