समाचारहरू

गत वर्षको खडेरीले मुगुका २४ गाविसका लागि राहत स्वरुप सरकारले ७ हजार क्विन्टल चामल वितरण गर्ने भनेपनि सरकारले समयमा ढुवानी नगर्दा राहतको चामल एक वर्षबितिसक्दासमेत गाँउमा पुग्न सकेको छैन ।

गएको वर्ष २४ गाविस मध्ये १२ गाविस खाद्यान्न सङ्कटग्रस्त र १२ खाद्य उन्मुख गाविस घोषणा गरेको थियो । तत्काल राहतका लागि जिल्लाका सबै गाँउमा ७ हजार क्विन्टल चामलको कोटा निर्धारण गरेको भएपनि एक वर्षबितिसक्दा समेत नेपाल सरकारको अर्थ मन्त्रालयले ढुवानीका लागि आवश्यक रकम विनियोजन नगर्दा ३ हजार २ सय ३३ क्विन्टल ४ किलो चामल जिल्लामा नपुगेको हो ।

सुख्खा खडेरी गाविस राहत कार्यक्रमको ७ हजार क्विन्टल मध्ये करान भेगका माँग्री, पुलु, किम्री, डोल्पु, मुगु गाविसको १ हजार ४ सय १७ घरधुरीका लागि १ हजार ५ सय, सोरु भेगका रारा, कालै, धैनाकोट, भिई, नार्थपु, जिमा, फोतु गाविसका २ हजार ८ सय ४५ घरधुरीलाई २ हजार क्विन्टल, खत्याड भेगका श्रीकोट, सेरी, गम्था, खमाले, कोटडाँडा, सुकाढिक, र हृयागलु गाविसका ३ हजार ४ सय १० घरधुरीका लागी २ हजार र गम भेगका पाँच गाविस श्रीनगर, कार्कीबाडा, पिना, रोवा, र रुगाका ४ हजार ४ सय ५२ घरधुरीका लागि १ हजार ५ सय क्विन्टल गरी ७ हजार क्विन्टल चामल वितरण गर्ने भनिएको थियो ।

करान भेगको पुलु खाद्य डिपोको १ हजार ५ सय मध्ये १ हजार १ सय ५५ क्विन्टल ४० केजी, सोरुकोट डिपोको २ हजार कोटामध्ये १ हजार २ सय ७९ क्विन्टल, श्रीकोट खाद्य डिपोका लागि निधारण गरिएको २ हजार मध्ये ७ सय ९८ गरी जम्मा ३ हजार २ सय ३३ क्विन्टल ४ किलो चामल ढुवानी हुन सकेको छैन ।

ढुवानीका लागि आवश्यक पर्ने रकम अर्थ मन्त्रालयले निकासा नगर्दा एक वर्षबितिसक्दा पनि खडेरीग्रस्त गाविसलाई चामल पुर्‍याउन नसकिएको खाद्य संस्थान मुगुका निमित्त प्रमुख कर्णबहादुर रावलले बताए ।

जिल्लाको सबै भन्दा बढी खडेरीग्रस्त क्षेत्रका रूपमा सोरु भेगका सात गाविसलाई लिइएको थियो । सरकारले सात गाविसका लागि २ हजार क्विन्टल चामल राहत स्वरुप वितरण गर्ने भनेको भएपनि एक वर्षसम्म ७ सय २१ क्विन्टल चामल मात्र त्यस क्षेत्रमा पुगेको जिल्ला खाद्य संस्थानले बताएको छ । तर, जिमा गाविस सोरुकोटका पदम शाहीले भने राहतको चामल एक गेडा पनि सोरु भेगका खडेरी पीडितले नपाएको आरोप लगाएका छन् ।

जीवन सेजुवाल