सरकारले गङ्गामायाको जीवन रक्षाको पहल नगरेको आरोप

  ०७३ भदौ २७ गते

छोराको हत्यामा संलग्नलाई कारबाहीको माग गर्दै अनशनरत गोरखा फुजेलकी गङ्गामाया अधिकारीको जीवन रक्षाका लागि सरकारले पहल नगरेको जिल्लाका अधिकारकर्मीहरूले आरोप लगाएका छन् ।

प्रधानमन्त्री तथा मन्त्रीपरिषद कार्यालयको आयोजनामा भदौ २७ गते गोरखामा भएको कार्यक्रममा अधिकारकर्मी स्थानेश्वर दुवाडीले यति लामो समयसम्म न्यायको माग गर्दै अनसन बसेकी गङ्गामायाको जीवन रक्षाका लागि सरकारले पहल नगरेको आरोप लगाएका हुन् ।

उनले अधिकारीको वर्तमान अवस्था र उनका मागबारे सरकारले के सोचिरहेको छ भनेर प्रश्न गरेका थिए ।

छोरा कृष्णप्रसादको हत्यामा संलग्न भन्दै किटानी जाहेरी दिएकाहरूलाई गिरफ्तार गरी कारबाही गर्न माग गर्दै अनशन बसेकै बेला गङ्गामायाका पति नन्दप्रसादको ०७१ असोज ६ गते मृत्यु भएको थियो । उनको शव अहिले पनि त्रिवि शिक्षण अस्पतालमा राखिएको छ । सरकारले नन्दप्रसादको दाहसंस्कार गर्ने वातावरणसमेत बनाउन नसकेको भन्दै दुवाडीले प्रधानमन्त्री कार्यालयको ध्यानाकर्षण गराएका छन् ।

जवाफमा प्रधानमन्त्री तथा मन्त्रीपरिषद कार्यालयका उपसचिव लोकहरि बस्यालले अधिकारी परिवारको मागबारे कर्मचारीको तहबाट जवाफ दिन नसकिने बताए । त्यसका लागि राजनीतिक तहमा छलफल हुनुपर्ने उनको भनाइ छ ।

सो कार्यक्रममा जिल्लामा मानव अधिकार र लैङ्गिक हिंसाको अवस्था र केन्द्रिय कार्ययोजनाहरू कार्यान्वयन भए नभएको बारे पनि छलफल भएको थियो । छलफलमा बोल्दै जिल्लास्थित विषयगत कार्यालयका प्रमुख, अधिकारकर्मी, सञ्चारकर्मीलगायतले अदालतका फैसला कार्यान्वयन नहुँदा दण्डहीनता बढेको भन्दै चिन्ता व्यक्त गरेका थिए ।

प्रमुख जिल्ला अधिकारी नारायणप्रसाद भट्टले मानव अधिकार र लैङ्गिक हिंसा जस्तो जटिल विषयमा समाजका सबै पक्षबीच सहकार्य हुनुपर्नेमा जोड दिए ।


हरिराम उप्रेती