समाचारहरू

मङ्सिर २१ गते भएको प्रतिनिधि सभा तथा प्रदेश सभा निर्वाचनको समीक्षा गर्न स्याङ्जाको वालिङमा निर्वाचन क्षेत्र नम्बर २ को समीक्षा बैठक चलिरहेका बेला नेपाली काङ्ग्रेसका कार्यकर्ताबिच नै विवाद बढेपछि कुटाकुट हुँदा तीन जना कार्यकर्ता घाइते भएका छन् ।

पुस १० गते बेलुकी भएको समीक्षा बैठकमा चुनावमा असहयोग गरेको विषयमा विवाद बढ्दै जाँदा नेपाली काङ्ग्रेसका कार्यकर्ताबिच झडप हुँदा तीन जना घाइते भएको जिल्ला प्रहरी कार्यालय, स्याङ्जाले जनाएको छ ।

चुनावको विषयमा छलफल भइरहेका बेला उपप्रधान एवम् शिक्षा मन्त्री गोपालमान श्रेष्ठका समर्थकले आफूहरूलाई चुनावमा असहयोग गरेको भन्दै आक्रमण गरेपछि नेपाली काङ्ग्रेसका कार्यकर्ता भेषराज अर्याल, कमल ढकाल र सुशिल काफ्ले घाइते भएका हुन् ।

कुटपिटका कारण घाइते भएका अर्याल र ढकालको उपचार पोखरामाहुन नसकेपछि थप उपचारको लागि सोही दिन हेलिकप्टरबाट काठमाडौँ लगिएको घटनाका प्रत्यक्षदर्शी शोभाकान्त ढकालले बताए ।

प्रत्यक्षदर्शी ढकालले घटनामा परी सामान्य घाइते भएका काफ्ले स्थानीय मेडिकलमा उपचार पश्चात् घर फर्किएका जनाइएको छ । अर्याल र ढकालको भने काठमाडौँको बल्खुस्थित बयोधा अस्पतालमा उपचार भइरहेको ढकालले जानकारी दिए । अर्यालको टाउकोमा र ढकालको दाहिने हातमा चोट लागेको ढकालको भनाई छ ।

काङ्ग्रेस जिल्ला सभापति कमल प्रसाद पङ्गेनी सहितका जिल्लास्तरीय नेताहरू सहभागी बैठकमा कुटाकुट भएको थियो । समीक्षा बैठकमा झडप भएको खबर पाए लगत्तै घटना स्थल पुगेको वडा प्रहरी कार्यालयको टोली पुगेको भएपनि घटनामा संलग्न पक्षलाई गिरफ्तार गरिएको छैन । प्रहरी टोलीलाई काङ्ग्रेस कार्यकर्ताहरूले आफूहरूको आन्तरिक कुरा भएको भन्ने प्रतिक्रिया दिएको र सो घटनामा पीडित पक्षको उजुरी आएपछि अनुसन्धान थालिने वडा प्रहरी कार्यालयका असई नवराज केसीले बताए ।

हिमलाल पराजुली