समाचारहरू

गुल्मी कारागारमा तीन वर्ष पछि स्वास्थ्यकर्मी हाजिर भएका छन् । कारगारमा स्वास्थ्यकर्मी नहुँदा कैदीबन्दीलाई परेको प्रभावको बारेमा इन्सेक अनलाइनमा ०७७ कात्तिक २१ गते, ०७८ माघ ९ मा समाचार प्रकाशित भएको थियो ।

यसैगरी, इन्सेकद्वारा प्रकाशित नेपाल मानव अधिकार वर्ष पुस्तक र पूर्व समीक्षाहरूमासमेत उक्त समस्याका बारेमा छलफल हुदै आएको थियो  । जुन समस्या तीन वर्षपछि समाधान भएको छ ।

गुल्मी कारागारमा तीन वर्षपछि सिनियर अहेव प्रकाशचन्द्र घिमिरे आफ्नो दरबन्दीमा हाजिर भएका छन् । उहाँ ०८० साउन १६ गतेबाट कार्यालयमा उपस्थित भएर कामकाज सुरू गरेको कारागारका निमित्त प्रमुख रेश्मीराज पन्थीले जानकारी दिनुभयो ।

गुल्मी कारागारमा सिनियर अहेवको दरवन्दी  थियाे । तर, दरबन्दीमा कार्यरत सिनियर अहेव घिमिरे २०७७ जेठदेखि स्वास्थ्य मन्त्रालयको काजमा रहेर काम गरिरहेका थिए । ०८० असार १७ गते इन्सेकले आयोजना गरेको मानव अधिकार वर्ष पुस्तक –२०२४ प्रकाशन पुर्व अर्ध बार्षिक समीक्षामा पनि इन्सेक गुल्मीको प्रतिवेदनमा छलफल गर्दै प्रमुख जिल्ला अधिकारी टेक बहादुर केसी र जिल्ला समन्वय प्रमुख द्रोर्णबहादुर खत्रीले स्वास्थ्यकर्मी नहुँदा कैदीबन्दीहरूलाई उपचारमा परेको प्रभावको बिषयमा आफुहरू गम्भीर भएको जनाउनु भएको थियो ।

त्यसपछि तत्काल पत्राचार गरेर सिनियर अहेव घिमिरेलाई दरबन्दीमा फिर्ता गराएको जिल्ला प्रशासन कार्यालय गुल्मीका सूचना अधिकारी हरिप्रसाद गैरेले जानकारी दिनुभयो ।

कारागारका अनुसार कैदीबन्दीहरू दैनिक पाँच/सात जना बिरामी पर्छन् । केहि दिर्घरोगीहरू पनि छन् । तर, उनीहरुलाई व्यवस्थित उपचार गराउन अस्पताल लैजाने जनशक्ति कारागारसँगै छैन् । जसका कारण निकै समस्या भएकाले कैदीबन्दीहरूले प्रशासन, मानव अधिकारकर्मी र विभिन्न निकायले गर्ने  अनुगमनको क्रममा दरबन्दी अनुसारको स्वास्थ्यकर्मीहरु माग गर्ने गरेका थिए ।

टोपलाल अर्याल