समाचारहरू

फाकफोकथुम गाउँपालिका-४ फुयाँतप्पा ४४ वर्षीय पत्रकार लिला लिम्बूले समाचारको विषयलाई लिएर चुलाचुली गाउँपालिका-६ साखफाराका २० वर्षीय सौगात राईले धम्की दिएको आरोप लगाउनु भएको छ ।

लोकलसन्देश डटकममा कार्यरत र नेपाल पत्रकार महासङ्घ इलाम, शाखा सदस्य लिम्बूले आफूलाई राईले साउन २९ गते किन समाचार लेखिस् भनेर धम्की दिएको बताउनु भयो ।

स्थानीय एक महिलाले संस्थाबाट प्रक्रिया पूरा गरिसकेपनि बचत फिर्ता नपाएको बारे आफूले साउन २७ गते समाचार लेखेको र सोही समाचारको विषयलाई राईले धम्की दिएको पीडित पत्रकारको आरोप छ ।

जीवन विकास लघुवित्त वित्तीय संस्था शाखा कार्यालय, मिक्लाजुङ रविका प्रमुख महेश्वर मण्डलले सौगात राई आफ्नो संस्थाको कर्मचारी भएको कर्मचारीबाट केही गल्ती भए संस्थाको तर्फबाट आफूले माफी माग्ने बताउनु भयो ।

धम्की दिएको विषयमा पीडित पत्रकारले साउन २९ गते पत्रकार महासङ्घ इलाम, शाखामा निवेदन दिएको सचिव भीम चापाँगाईँले बताउनु भयो ।

घटनाको विषयमा महासङ्घले विज्ञप्ति जारी गरी विरोध जनाएको छ ।

“समाचारको विषयमा चित्त नबुझे त्यसमाथि सुनुवाई गर्ने कानुनी बाटो हुँदाहुँदै पत्रकारको घरमै आएर मानसिक तनावसमेत दिनेगरी धम्क्याउनु र गलत मनसायले भिडियो खिचेर लैजानु निन्दनीय छ ।” सचिव चापाँगाईँद्वारा जारी विज्ञप्तिमा उल्लेख छ ।

मानव अधिकार रक्षकसम्बन्धी घोषणपत्र सन् १९९८ ले पत्रकारलाई मानव अधिकार रक्षकका रूपमा परिभाषित गरेको छ ।

मनोज अधिकारी