समाचारहरू

जिल्ला अस्पताल, बाजुरा र प्राथमिक स्वास्थ्य केन्द्र, केल्टीमा गर्भवती तथा सुत्केरीहरुको चेकजाँच गरेबापत शुल्क लिने गरेको विषयलाई प्राथमितामा राखेर इन्सेक अनलाइन तथा जिल्लास्थित विभिन्न पत्रपत्रिकामा समाचार प्रकाशित भएपछि जिल्ला अस्पताल र प्राथमिक स्वास्थ्य केन्द्रले गर्भवती तथा सुत्केरीहरुको निःशुल्क चेकजाँच गर्ने निर्णय गरेको छ ।

नेपाल सरकारले गर्भवती तथा सुत्केरीले सरकारी स्वास्थ्य संस्थामा चेकजाँच तथा सेवा लिएबापत सम्पूर्ण सेवा निःशुल्क हुने व्यवस्था गरेको छ । तर, जिल्ला अस्पताल, बाजुरा र प्राथमिक स्वास्थ्य कन्द्र, कोल्टीले गर्भवती तथा सुत्केरीको चेकजाँच, भिडियो एक्सरे, प्रयोगशाला लगायतका सेवाबापत शुल्क लिने गरको थियो ।

इन्सेकलगायत जिल्लास्थित विभन्न सञ्चार माध्यमबाट ०८० साउन १७ गते गर्भवती र सुत्केरीको चेकजाँचमा शुल्क लिने गरेको समाचार प्रकाशन तथा प्रसारण भएपछि गर्भवती तथा सुत्केरीहरुको सम्पूर्ण चेकजाँच निःशुल्क हुने निर्णय गरिएको जिल्ला अस्पताल, बाजुराका सूचना अधिकारी नृपराज गिरीले बताउनु भयो ।

भिडियो एक्सरे बापत ४ सय रुपियाँ लिँदै गरेको जिल्ला अस्पतालले ०८० साउन २९ गतेदेखि गर्भवती र सुत्केरीबाट कुनै शुल्क नलिने निर्णय गरी सेवा समेत सुरु गरेको र यस भन्दा अगाडि यस विषयमा आफूलाई जानकारी नभएकोले शुल्क लिने गरिएको उहाँले बताउनु भयो ।

गर्भवती तथा सुत्केरीहरुलाई अस्पतालको निर्देशन अनुसार नियमित चेकजाँच, भिडियो एक्सरेलगायतका सेवा निःशुल्क हुने तर अन्य समयमा भिडियो एक्सरे, प्रयोगशाला चेकजाँच गराए बापत नियमानुसार शुल्क लाग्ने सूचना अधिकारी गिरीको भनाइ छ ।

जिल्ला अस्पताल, बाजुराले गर्भवती तथा सुत्केरीहरुको स्वास्थ्य चेकजाँच निःशुल्क गर्ने निर्णय गरेसँगै प्राथमिक स्वास्थ्य केन्द्र, कोल्टीले पनि गर्भवती तथा सुत्केरीहरुको स्वास्थ्य चेकजाँच निःशुल्क गर्ने निर्णय गरी सेवा समेत सुरु गरेको छ ।

आमा तथा नवजात शिशु सुरक्षा कार्यक्रम निर्देशिका २०७८ को परिच्छेद २ र ३ मा सम्पूर्ण सेवा निःशुल्क हुने भनिएकोमा जिल्लाका केही स्वास्थ्य संस्थाले शुल्क लिने गरेको पाइएको थियो ।

‘स्वास्थ्य संस्थाहरुले प्रसूति सेवामा शुल्क लिने गरेपछि सेवाग्राही मार्कामा’ शीर्षकको समाचार साउन १७ गते इन्सेक अनलाइनमा प्रकाशन गरिएको थियो ।

पदमबहादुर सिंह