समाचारहरू

रसुवामा पशुमा लाग्ने लम्पी स्किन रोगको उपचार तथा रोगका लक्षण देखा नपरेकालाई रोगविरूद्ध खोप शुरु गरेको छ ।

पशु स्वास्थ्य प्राविधिक बुद्धिनाथ न्यौपानेका अनुसार कालिका गाउँपालिका भरी गाईगोरु सङ्क्रमित १ सय ५७ सङ्क्रमित भएकोमा उपचारपछि ५० ओटा निको भएका छन् भने २४ ओटाको मृत्यु भएको छ ।

हलै एक भैँसीमा पनि मिल्दो लक्षण देखा परेको छ । लम्पी स्किन रोगविरूद्ध कालिका गाउँपालिकाले ५ सय डोज र पशु विज्ञ केन्द्र ३ सय डोज खोप उपलब्ध गराएकोले रोग नलागेका गाई गोरुलाई लम्पी स्किन रोगविरूद्ध खोप सुरु गरेको न्यौपानेले बताउनु भयो ।

‘रसुवामा पशुमा लाग्ने लम्पी स्किन रोगको औषधि अभाव हुँदा किसान मर्कामा’ शीर्षकमा इन्सेक अनलाइनमा साउन १२ गते समाचार प्रकाशन भएको थियो । सोही समाचारको प्रभावले कालिका गाउँपालिकाले बिरामी पशुहरूमा लम्पी स्किन रोगविरूद्धको खोप लगाउन शुरु गरेको पशु स्वास्थ्य शाखाका पशु प्राविधिक बुद्धिनाथ न्यौपानेले जानकारी दिनुभयो ।

जिल्लाका पाँच ओटै गाउँपालिकामा पशुमा लाग्ने लम्पी स्किन रोगको औषधि अभाव हुँदा किसान मर्कामा परेका छन् । लम्पी स्किन रोगका कारण जिल्लाभर दुई सयभन्दा बढी पशु मरेका छन् ।

नौकुण्ड गाउँपालिकामा खोप कार्यकर्ता राखेर गाउँपालिकाले ५ सय डोज खोप चौरीमा खोप लगाएको पशु प्राविधिक रामशरण न्यौपानेले बताउनु भयो । नौकुण्ड गाउँपालिकामा हालसम्म चौँरी, गाई र गोरु गरी २ सय ओटा मरेका छन् । त्यहाँ विज्ञ केन्द्रबाट प्राप्त खोप पनि गाईगोरुमा लगाउने कार्य सुरु गरिएको छ ।

गोसाइँकुण्ड गाउँपालिकामा मात्र लम्पी स्किनका कारण २६ ओटा चौँरी, एक ओटा याक र ४८ ओटा स्थानीय जातका गाईगोरु मरेको पशु सेवा प्राविधिक प्रमुख सुरेश बरालले जानकारी दिनुभयो । उहाँका अनुसार १ हजारभन्दा बढी पशु लम्पी स्किनबाट सङ्क्रमित भएका छन् । त्यहाँ पनि पशु विज्ञ केन्द्र, नुवाकोटले ३ सय डोज खोप उपलब्ध गराएकोले खोप लगाउने कार्य सुरु भएको छ ।

समयमा औषधि उपचार नभएको कारण पशुवस्तु मरेको र बिमा दाबी पनि नहुने कुराले त्रासित भएको गोसाइकुण्ड गाउँपालिका-६ का किसान फुर्पा तामाङले उल्लेख गर्नुभयो । रसुवाका सबै स्थानीय तहमा लम्पी स्किन रोगविरूद्ध ३/३ सय डोज खोप उपलब्ध गराएको पशु विज्ञ केन्द्र कार्यालय, नुवाकोटले जनाएको छ ।

हेमनाथ खतिवडा