समयमै पाठ्यपुस्तक नपुग्दा बालबालिकाहरु विद्यालय जानबाट वञ्चित

  ०७९ जेठ २६ गते

नेपालको संविधानको धारा ३१ मा प्रत्येक नागरिकलाई राज्यबाट आधारभूत तहसम्मको शिक्षा अनिवार्य र निःशूल्क तथा माध्यमिक तहसम्मको शिक्षा निःशूल्क पाउने हक उल्लेख गरिएको भएपनि जिल्लाका अधिकांश विद्यालयहरुमा पाठ्यपुस्तक नपुग्दा बालबालिकाहरु विद्यालय जानबाट वञ्चित भएका छन् ।

नयाँ शैक्षिक सत्र सुरु भएको दुई महिना वितिसक्दासम्म विद्यालयमा सबै पाठ्यपुस्तक नपुगेका कारण पठनपाठनमा समस्या भएको छत्रेश्वर माध्यमिक विद्यालयका प्रधानध्यापक मुक्तिराज जोशीले बताउनु भयो ।

उहाँले भन्नु भयो– ‘साउन महिनामा विद्यार्थीहरुको  त्रैमासिक परीक्षा लिनु पर्ने हुन्छ । विद्यालयमा पाठ्यपुस्तक नभएपछि विद्यालय खुल्न सकिएको छैन् । यसले गर्दा विद्यार्थी र शिक्षकहरुलाई नै समस्या हुने भएको छ ।’

विगतका वर्षमा कोभिडका कारण थला परेको शिक्षा क्षेत्रलाई सुधारउन्मूख बनाउन यो वर्ष समयमै पाठ्यपुस्तक पुग्नु पर्ने भएपनि समय मै पाठ्यपुस्तक नपुग्दा अहिलेसम्म विद्यालय खोल्न नसकिएको भुवनेश्वरी माध्यमिक विद्यालयका प्रधानध्यापक जयराज पाण्ड्येले बताउनु भयो ।

उहाँले भन्नु भयो– ‘समयमै पाठ्यपुस्तक पुग्न सकेको छैन् । स्थानीय तह निर्वाचनका कारण विद्यार्थी भर्ना अभियान पनि प्रभावकारी हुन सकेन । धेरै बालबालिकाहरु विद्यालय भर्नाबाट समेत वञ्चित हुनु परेको छ ।’

कहिल्यै कोभिडका नाममा, कहिल्यै निर्वाचनका नाममा त कहिल्यै पाठ्यपुस्तक अभावका नाममा बालबालिकाहरुको भविष्यमाथि खेलवाड हुने गरेको विद्यार्थी सङ्गठन अनेरास्ववियु, डोटीका अध्यक्ष बिरबहादुर विष्टले बताउनु भयो ।

पाठ्यपुस्तक समस्याका सन्दर्भमा जिल्ला शिक्षा समन्वय इकाईलाई समयमै जानकारी गराएको भएपनि सुनुवाइ हुन नसकेको अध्यक्ष विष्टको भनाइ छ ।

जिल्ला शिक्षा समन्वय इकाई, डोटीका प्रमुख मदन जोशीले जिल्लाका सबै विद्यालयका लागि प्रयाप्त मात्रामा पाठ्यपुस्तक आइसकेको र सम्पुर्ण स्थानीय तहमा पठाइसकेको बताउनु भयो ।

स्थानीय निर्वाचनका कारण यो वर्ष समय मै पाठ्यपुस्तक नपुग्नु हाम्रो जिल्लाको मात्र समस्या नभइ देशभरीको समस्या रहेकाले अहिले प्रयाप्त मात्रामा जिल्लाभरी पाठ्यपुस्तक पुगिसकेको र हालसम्म सञ्चालनमा नरहेका विद्यालयका बारेमा जिल्लाका सबै स्थानीय तहका शिक्षा इकाईसँग सम्पर्क गरी यथासिघ्र विद्यालय खोल्न निर्देशन दिने जिल्ला समन्वय इकाईका प्रमुख जोशीको भनाइ छ ।


गणेश जोशी