समाचारहरू

सरकारले श्रमिकको ज्याला बढाउने योजना बनाइरहेका बेला गुल्मीका श्रमिकहरूले समयमै ज्याला नपाउने गरेको गुनासो गरेका छन् ।

१२९ औँ अन्तर्राष्ट्रिय श्रमिक दिवसको अवसरमा निर्माण मजदुर हकहित संरक्षण समिति गुल्मीले वैशाख १८ गते आयोजना गरेको कार्यक्रममा श्रमिकले समयमै ज्याला नपाएको सरोकारवालाले गुनासो गरेका हुन् ।

आफूहरूलाई ठेकेदारहरूले तोकिएको समयभन्दा बढी काममा लगाउने र भनेको बेला ज्यालासमेत नदिने गरेको मजदुर रामबहादुर परियारले बताए ।

उनले आठ घण्टा काम, आठ घण्टा मनोरञ्जन र आठ घण्टा आराम भन्ने कुरा भाषणमा मात्र सीमित भएको गुनासो गरे । 'धेरैले काम गरेको ज्याला पाएका छैनन् । के को दिवस?'-उनले भने-'केलाई आठ घण्टा काम, आठ घण्टा मनोरञ्जन र आठ घण्टा आराम भन्ने?'

मजदुर गीतादेवी थापाले भाषणमा धेरैले आठ घण्टा भने पनि व्यावहारमा केही लागु नभएको बताइन् । उनले थुप्रै सभामा चर्का भाषण गर्ने नेता नै ठेकेदार भएको र उनीहरूले नै श्रमिकलाई दमन गरिरहेको आरोप लगाइन् ।

जिल्लामा मजदुरहरूको हकहितको लागि निर्माण मजदुर हकहित संरक्षण समिति छ । उसले कार्यस्थलमै श्रमिकको मृत्यु भएमा १० हजार रुपियाँ, घाइते भएमा ५ हजार रुपियाँ र सुत्केरी भएमा १ हजार रुपियाँ सहयोग पनि उपलब्ध गराउँछ । तर, त्यसबारे धेरै जानकार छैनन् ।

धेरै श्रमिकहरू सचेत नभएका कारण समितिमा आवद्ध गर्न नसकिएको समितिका अध्यक्ष ओले रानाले बताए । निर्माण व्यावसायी सङ्घ गुल्मीका अध्यक्ष नारायण पोखरेलका अनुसार सरकारले योजनाको समयमै रकम भुक्तानी गर्न नसक्दा कहिलेकँही मजदुरहरूको पारिश्रमिक रोकिए पनि धेरै गुनासो नभएको बताए । 'सरकारले काम गरेको पैसा समयमै तिर्दैन ।'-उनले भने-'थुप्रै ठेकेदार साथीहरूले पाँच रुपियाँ व्याजमा ऋण काढेर काम गरेका छन् । केहिलेकँही मजदुरको पनि पैसा रोकिन्छ ।'

टोपलाल अर्याल