समाचारहरू

समयमा नै उपचार नपाउँदा अरूण तेस्रो जलविद्युत आयोजनाको ड्याम साइड फ्याक्सिन्दामा कार्यरत बर्दिया जिल्ला, ठाकुरबाबा नगरपालिका-९ का ४९ वर्षीय तुलसीराम थारूको भदौ ९ गते मृत्यु भएको छ ।

नौ सय मेगावाट क्षमताको निमार्णाधीन अरूण तेस्रो जलविद्युत आयोजनाको ड्याम साइड फ्याक्सिन्दामा आपतकालीन स्वास्थ्य संस्था नहुँदा र परियोजनाले समेत आकस्मिक उपचारका लागि स्वास्थ्य संस्थाको व्यवस्था नगर्दा घाइते मजदूर थारूको समयमा उपचार नहुँदा मृत्यु भएको जिल्ला प्रहरी कार्यालयका इन्स्पेक्टर अभिशेकुमार श्रेष्ठले बताउनु भयो ।

सुरुङभित्र काम गर्ने क्रममा भदौ ९ गते राति माथिबाट खसेको ढुङ्गाले लागेर घाइते भएका थारूलाईे उपचारका लागि जिल्ला अस्पतालमा भर्ना गर्ने बित्तिकै चिकित्सकले मृत घोषित गरेका थिए ।

अरूण तेस्रो जलविद्युत परियोजनास्थलमा स्वास्थ्य संस्था नहुँदा परियोजना सुरुआत भएयता २४ जना बढी मजदूरले ज्यान गुमाउनु परेको छ । चौविसै घण्टा निमार्ण कार्य हुने आयोजनामा कोही मजदुरलाई चोटपटक लागेर घाइते भए समयमा उपचार नपाउँदा ज्यान गुमाउनु पर्ने अवस्था छ ।

आयोजनास्थलमा काम गर्ने मजदुरको समय-समयमा  स्वास्थ्य परीक्षण गर्नुपर्ने विकास सम्झौतामा उल्लेख भए पनि मजदुरको स्वास्थ्य परीक्षण नभएको मजदुरको भनाइ छ ।

अरूण तेस्रो जलविद्युत परियोजनामा भारतीय र नेपालीसहित ३ हजारभन्दा बढी मजदुर कार्यरत छन् । नेपाललाई २१ दशमलव ९ प्रतिशत अर्थात् १९७ दशमलव १ मेगावाट बिजुली निःशुल्क प्राप्त हुने सो आयोजनाबाट विभिन्न शीर्षकमा ३ खर्ब ४८ अर्ब आर्थिक लाभ हुने अनुमान छ ।

आयोजनाबाट २५ वर्षमा नेपालले रोयल्टी, निःशुल्क विद्युत् र आयकर गरी ३ खर्ब ४८ अर्ब प्राप्त गर्नेछ । निर्माण सम्पन्न भएको २५ वर्षपछि परियोजना नेपाल सरकारको स्वामित्वमा आउनेछ ।

भारतीय कम्पनी सतजलले निर्माण गरिरहेको परियोजना स्थलको अनुगमन सरकारीस्तरबाट हुने भएपनि हालसम्म मजदूरको सुरक्षा, स्वास्थ्य उपचारलगायतका विषयमा प्रशासनले अनुगमन गरेको छैन् ।

भविन कार्की