समाचारहरू

सरकारले सप्तरी घटनाका ज्यान गुमाएका व्यक्तिका परिवारलाई १० लाख रुपियाँ क्षतिपूर्ति दिने निर्णय गरेको छ । मन्त्रिपरिषद्को फागुन २५ गते बसेको बैठकले सप्तरी घटनामा ज्यान गुमाएका परिवारजनप्रति समवेदना प्रकट गर्दै क्षतिपूर्ति स्वरुप उक्त रकम दिने निर्णय गरेको हो ।

बैठकले घटनामा घाइते भएकाहरूलाई निशुल्क उपचारको व्यवस्था गर्ने निर्णय समेत गरेको छ । साथै घटनाको छानबिन गर्न तीन सदस्यीय जाँचबुझ आयोग गठन गर्ने बैठकले निर्णय गरेको स्थानीय विकास मन्त्री हितराज पाण्डेले जानकारी दिएका छन् ।

उनले गठन हुने उक्त जाँचबुझ आयोगमा सर्वोच्च अदालतका पूर्व न्यायाधीश वा न्याय सेवाबाट अवकाश पाएका विशिष्ट व्यक्ति रहने व्यवस्था गरिएको बताए । आयोगका पदाधिकारीहरू प्रधानमन्त्रीको सहमतिमा नियुक्त हुने र १५ दिनभित्र घटनाको छानबिन गरी सरकारलाई प्रतिवेदन बुझाउन आयोगलाई समय निर्धारण गरिएको पनि जनाइएको छ ।

एमालेले थालेको मेची-महाकाली अभियानको क्रममा फागुन २३ गते सप्तरीमा आयोजना गरेको सभालाई बिथोल्न गएका मधेसी मोर्चाका कार्यकर्ता र प्रहरीबिच भएको झडपका कारण चार जनाको मृत्यु भएको थियो ।

विवेक ढुङ्गाना