समाचारहरू

सप्तरीको राजविराजमा फागुन २३ गते प्रहरीको गोली लागेर घाइते ६ जनाको विपी कोइराला स्वास्थ्य विज्ञान प्रतिष्ठान धरानमा उपचार भइरहेको छ ।

राजविराजमा फागुन २३ गते नेकपा एमालेले गरेको आमसभाविरुद्ध प्रदर्शनमा उत्रेका मधेसी मोर्चाका कार्यकर्ता र प्रहरीबिच झडप भएको थियो झडपमा प्रहरीले चलाएको गोली लागेर तीन जनाको मृत्यु र ६ जना घाइते भएका छन् ।

घटनामा गोली लागेर सप्तरीको प्रस्वनी गाविस-४ का ४० वर्षीय आनन्द साह, मलेठ गाविस-४ का ५० वर्षीय पिताम्बरलाल मण्डल र मलेठ गाविस-२का २५ वर्षीय रञ्जन भनिने सज्जन मेहताको मृत्यु भएको थियो । मृतकको शव विपी कोइराला स्वास्थ्य विज्ञान प्रतिष्ठानको शवघरमा राखिएको छ ।

घटनामा प्रहरीको गोली लागेर घाइते मलेठ गाविस-२ का ३८ वर्षीय विरेन्द्रकुमार महतो, राजविराज नपा-७ का ३३ वर्षीय जितन साह, राजविराज नपा-७ कै १५ वर्षीय सुरेन्द्रकुमार साह, मधेपुरा गाविस-२ का ५७ वर्षीय इनर यादव, राजविराज नपा-५ का ४३ वर्षीय दिगम्बर यादव र वरिपुर गाविस-१ सप्तरीका २३ वर्षीय दिलिप यादवको विपी कोइराला स्वास्थ्य विज्ञान प्रतिष्ठानमा उपचार भइरहेको छ ।

घटनामा प्रहरीको लाठी प्रहारबाट घाइते ६ जना उपचारपछि फागुन २४ गते घर फर्किएको प्रतिष्ठानले जनाएको छ ।

यस्तै प्रदर्शनकारीको ढुङ्गा प्रहारबाट घाइते प्रहरी जवान रमेश मङ्ग्राती र रञ्जित सिंह साथै एमाले कार्यकर्ता इटहरी उमनपा-४ का ५१ वर्षीय धनपति पाठकको पनि प्रतिष्ठानमा उपचार भइरहेको छ ।

शेखर ढकाल