समाचारहरू

सप्तरीको बसविट्टी गाविस-५ मा फागुन २३ गते मधेसी मोर्चाका कार्यकर्ता र प्रहरीबिच झडप हुँदा प्रहरीले चलाएको गोली लागेर घाइते जमुनी मधेपुरा गाविस-२ का ५७ वर्षीय इनर यादवको उपचारका क्रममा फागुन २७ गते दिउँसो मृत्यु भएको छ ।

यादवको मृत्युसँगै उक्त घटनामा परी मृत्यु हुनेको सङ्ख्या पाँच पुगेको छ । यसअघि एकजनाको घटना स्थलमै एक जना र उपचारका क्रममा तीन जनाको मृत्यु भएको थियो ।

पेटमा गोली लागेका उनको उपचारका क्रममा बिपी कोइराला स्वास्थ्य विज्ञान प्रतिष्ठान धरानमा मृत्यु भएको हो । उपचारका क्रममा दिउसो २:२० मा इनरको मृत्यु भएको प्रतिष्ठानले जनाएको छ ।

बसविट्टीमा फागुन २३ गते नेकपा एमालेले गर्न लागेको सभा विरुद्ध प्रदर्शन गर्दा मधेसी मोर्चाका कार्यकर्ता र प्रहरी बीच झडप भएको थियो झडपमा प्रहरीले चलाएको गोली नौ जनालाई लागेको थियो ।

प्रहरीको गोलीबाट घाइते अन्य चार जनाको बिपी कोइराला स्वास्थ्य विज्ञान प्रतिष्ठान धरानमै उपचार भइरहेको छ ।

शेखर ढकाल