समाचारहरू

सप्तकोशी नगरपालिका कार्यालयमा फागुन ८ गते भएको प्रदर्शनमा कार्यालय तोडफोड भएको छ भने वडा अध्यक्षसहित दुई जना घाइते भएका छन् ।

ढुङ्गामुढाबाट वडा नम्बर ४ का वडा अध्यक्ष बद्रीनारायण चौधरी, वडा नम्बर २ का सदस्य जाहिर हुसेन, वडा नम्बर ९ का स्थानीय किसान यादव घाइते हुनु भएको छ ।

नगर प्रमुख उत्तमकुमार शर्माले फागुन ८ गते एक विज्ञप्ति जारी गरी कार्यालय तोडफोड गर्ने तथा जनप्रतिनिधि, कर्मचारी र सुरक्षाकर्मीलाई भौतिक चोट पु¥याउने घटनाप्रति खेद व्यक्त गर्नु भएको छ ।

महिला नगर प्रहरीमाथि हातपात र ढुङ्गामुढा गरी कार्यालयको सिसा, सवारी साधन, कम्प्युटर, डिजिटल सूचना बोर्डलगायतका कार्यालय सामान तोडफोड गरेको उहाँले जानकारी दिनुभयो । कार्यालय तोडफोडबाट करिब ५ लाख रुपियाँ बराबरको क्षति भएको शर्माले जानकारी दिनु भयो ।

विभिन्न ६ बुँदे माग राखी सङ्घर्षमा उत्रिएको नेपाली कांग्रेस, नेकपा माओवादी केन्द्र, जनता समाजवादी पार्टी र नेकपा एकीकृत समाजवादी पार्टीले फागुन ५ गते नगरपालिकामा गरेको तालाबन्दी फागुन ६ गते नगरपालिकाले खोलेपछि पुनः ताला लगाउन जाँदा घटना भएको हो ।

तालाबन्दी गर्न गएका सङ्घीय सत्ता गठबन्धन दलका कार्यकर्तालाई सुरक्षाकर्मीले रोकेपछि उनीहरूले गरेको ढुङ्गामुढाबाट वडा नम्बर ४ का वडा अध्यक्ष बद्रीनारायण चौधरी र वडा नम्बर ९ का स्थानीय किसान यादव घाइते हुनु भएको हो ।

प्रदर्शनकारीहरूले पछाडिबाट प्रहार गरेको ढुङ्गा लागेर प्रदर्शनको नेतृत्व गरिरहनुभएका चौधरी र यादव घाइते हुनु भएको हो । चौधरीको टाउकोमा र यादवको नाकमा चोट लागेको छ ।

घाइते दुवै जनाको उपचार स्थानीय फत्तेपुर पोलिक्लिनिकमा भइरहेको छ । वडा सदस्य हुसेन उपचारका लागि धरान पुग्नु भएको छ ।

प्रदर्शनकारीहरूले सप्तकोशी नगरपालिकाको कोभिडको खर्च र आन्तरिक लेखा परीक्षणको विवरण, राष्ट्रिय मावि फत्तेपुरको भवन निर्माणको ठेक्का प्रक्रिया र अङ्ग्रेजी माध्यम कक्षा सञ्चालन खर्च व्यवस्थापनको विवरण उपलब्ध गराउनु पर्ने, आर्थिक वर्ष २०७८÷०७९ मा नगरभित्रका सम्पूर्ण ११ ओटै वडाका योजनाहरू कार्यान्वयन हुनुुपर्ने माग राख्दै ताला लगाएका थिए ।

माग सम्बोधन नगरी नगरपालिकाले आफुखुशी ताला खोलेर द्वन्द्व निम्त्याएको सङ्घर्ष समितिको भनाइ छ ।

नगर प्रमुख शर्माले माग गरिएको खर्च विवरण नगरपालिकाले एक सातामै तयार पारे पनि लिन बोलाउँदा सङ्घर्ष समितिका कोही नआएको बताउनु भयो ।

वार्ताका लागि पटक–पटक बोलाए पनि नआएपछि नागरिक समाज, प्रहरी प्रशासनको रोहबरमा निर्णय गरी ताला खोलेको उहाँले बताउनु भयो ।

सेवा प्रवाह अवरोध हुँदा नागरिकलाई नै मर्का परेकाले ताला खोलिएको जानकारी दिनु भएका नगर प्रमुख शर्माले कार्यपालिका बैठकले निर्णय गरेर आन्दोलनरत पक्षलाई वार्तामार्फत समस्या समाधान गर्न पटक–पटक मौखिक र अन्ततः लिखित रुपमै विवरण लिन बोलाए पनि नआएको बताउनु भयो ।

वार्ताबाट समाधान हुने परिस्थितमा कार्यालयमा ढुङ्गामुढा गरी नियोजितरुपमा क्षति पु¥याउनु र जनप्रतिनिधि र कर्मचारीमाथि भौतिक चोट पु¥याउनु निन्दनीय रहेको नगर प्रमुख शर्माको भनाइ छ ।

मनोहरकुमार पोखरेल