सप्तरीमा चार ओटा मतदानस्थल परिवर्तन

  ०७९ वैशाख २८ गते

सप्तरी जिल्लामा चार ओटा मतदान केन्द्र रहेको विष्णुपुर गाउँपालिकास्थित गाविस भवन जमुनी मधेपुराबाट मतदान स्थल आज परिवर्तन गरिएको छ ।

सो मतदान स्थललाई एक सय मिटरको दुरीमा रहेको शारदा माध्यमिक विद्यालय जमुनी मधेपुरामा सारिएको जिल्ला निर्वाचन अधिकारी रमेशप्रसाद जोशीले जानकारी दिनु भयो ।

पहिले तोकिएको मतदानस्थलमा स्थान अभावका कारण मतदान गर्न ज्यादै असहज हुने भएकाले निर्वाचन अधिकृतको कार्यालयमा आज बसेको सर्वदलीय बैठकले नयाँ स्थल कायम गरेको निर्वाचन अधिकृत यादवप्रसाद न्यौपाने बताउनु भयो ।

आसन्न स्थानीय तहको निर्वाचनका लागि सप्तरीमा २ सय ९७ मतदानस्थल निर्धारण गरिएको छ । जसमा २ सय ८ ओटा अतिसंवेदनशील, ८५ ओटा संवेदनशील र चार ओटा मतदानस्थल सामान्य रहेको छ ।

सप्तरीको नौ नगरपालिका र नौ गाउँपालिकाको २ सय ९७ मतदानस्थलमा व्यवस्था गरिएको ५ सय ३६ मतदान केन्द्रका लागि ५ सय ३६ मतदान अधिकृत र त्यतिकै सङ्ख्यामा सहायक मतदान अधिकृत खटिएका छन् ।


मनोहरकुमार पोखरेल