समाचारहरू

सप्तरीको राजविराजमा फागुन २३ गते प्रहरीको गोली लागेर घाइते भएका मलेठ गाविस-२ का ३८ वर्षीय विरेन्द्रकुमार महतोको उपचारका क्रममा फागुन २५ गते मृत्यु भएको छ ।

पेटमा गोली लागेका उनको उपचारका क्रममा बिपी कोइराला स्वास्थ्य विज्ञान प्रतिष्ठान धरानमा मृत्यु भएको हो । उपचारका क्रममा बिहान पौने ९ बजे विरेन्द्रको मृत्यु भएको प्रतिष्ठानले जनाएको छ ।

विरेन्द्रसगैं सप्तरीमा प्रहरीको गोली लागेर मर्नेको संख्या चार पुगेको छ । यसअघि एकजनाको घटनास्थलमै र दुई जनाको उपचारका क्रममा मृत्यु भएको थियो ।

प्रहरीको गोलीबाट घाइते अरु पाँच जनाको बिपी कोइराला स्वास्थ्य विज्ञान प्रतिष्ठान धरानमै उपचार भइरहेको छ ।

इन्सेक सप्तरी जिल्ला प्रतिनिधि मनोहरकुमार पोखरेलका अनुसार मृत्युको खबरपछि उनका पत्नी रञ्जना मेहता र सासू द्रोपतीदेवी मेहता बेहोस भएका छन् ।

उनीहरूको राजविराजस्थित गजेन्द्रनारायण सिंह सगरमाथा अञ्चल अस्पतालमा उपचार भइरहेको छ । माओवादी द्वन्द्वकालमा प्रहरीको जागिर छाडेका मेहता मलेठ गाविस-२ स्थित ससुराली घरमा बसेर कृषी व्यवसाय गर्दथे । उनका नाबालक तीन छोरी र एक छोरा छन् ।

शेखर ढकाल