सप्तरीको रुपनीमा पाँच राउन्ड हवाइ फायर

  ०७९ वैशाख ३० गते

रुपनी गाउँपालिका–५ बसविट्टीस्थित वडा कार्यालय भवनमा भएको मतदानस्थलमा वैशाख ३० गते राति साढे ६ बजे पाँच राउन्ड हवाइ फायर भएको छ ।

मतदानस्थलमा उत्पन्न विवादले झडपको रुप लिएकाले हवाइ फायर गरिएको डिएसपी माधवप्रसाद काफ्लेले जानकारी दिनु भयो । हवाइ फायर भएपछि मतदाताहरु तितरबितर भएका छन् ।

दिउँसो सवा ४ बजे पानी पर्नाले प्रभावित भएको मतदान कार्य पुनः सुचारु भएपछि रुजु गरिसकेर मत खसालेका व्यक्तिले पुनः मतदान गरेको भन्दै दुई पक्षबीच विवाद भएको थियो । झडपपछि अवस्था नियन्त्रणमा लिन राजविराजबाट ठूलो सङ्ख्यामा प्रहरी, सशस्त्र प्रहरी र नेपाली सेना परिचालित गरिएको थियो ।

अर्काको नाममा मत खसाउन आएका व्यक्ति गिरफ्तारीमा परेपछि एउटै व्यक्तिले धेरै पटक बोकस मत खसाएको भन्दै विवाद सुरु भएको स्थानीय सन्तोष यादवले बताउनु भयो ।

शान्तिपूर्ण तरिकाले भएको निर्वाचनमा कांग्रेसका कार्यकर्ताहरुले बीचबीचमा निहुँ खोजेर विवाद बढाएको र कांग्रेसको इशारामा मतदान स्थगित गर्न खोजेको जसपाबाट गाउँपालिकाका अध्यक्षका उम्मेदवार हरेराम यादवले बताउनु भयो । कांग्रेस, लोसपा लगायतका पार्टीले भने निर्वाचन स्थगित गर्नुपर्ने माग गरेका छन् । निर्वाचन स्थगित गर्ने वा कायम राख्ने विषयमा दलहरुबीच विवाद रहेको छ ।

निर्वाचन अधिकृत कुमार मास्केले हवाइ फायर भएकोले सो केन्द्रकोे निर्वाचन स्थगित गर्नुपर्ने भन्दै सूचना तयार पारेको तर जसपा पक्षबाट नाराबाजी भइरहेकोले सूचना टाँस गर्न नसेकेको यादवले बताउनु भयो । मास्केले भने हवाइ फायरले मतदाताहरु तितरबितर भई स्वभाविक रुपमा गर्न पाउने मतदानबाट बञ्चित भएकोले स्थगित गर्नुपर्ने विषयमा सल्लाह भइरहेको बताउनु भयो ।

७ सय ५६ मतदाता रहेको मतदान केन्द्र ‘क’ मा ५ सय ९६ जनाले मतदान गरेका थिए भने ७ सय ६७ मतदाता रहेको केन्द्र ‘ख’ मा ५ सय ६२ जनाको मत खसेको थियो ।


मनोहरकुमार पोखरेल