सप्तकोशीको भङ्गालो गाउँ पस्दा बेलका नगरपालिकाका नौ हजार घरधुरी डुबानको उच्च जोखिममा

  ०७९ साउन १८ गते

अबिरल वर्षाका कारण सप्तकोशी नदीमा पानीको बहाव बढ्दै जाँदा उदयपुरको बेलका नगरपालिका–८ डुम्रीबोट पश्चिमबाट कोशीको भङ्गालो गाउँतर्फ पसेपछि नौ हजार घरधुरी डुबानको उच्च जोखिममा परेका छन् ।

बाढीमा फसेकाहरूलाई स्थानीय सरकारले रब्बरको वोट र गाडीबाट सुरक्षित स्थानतर्फ सारिरहेको छ ।

कोशी नदी पश्चिमतर्फको डिल कटान गर्दै गाउँपसेपछि बेलका नगरपालिकाका पाँच ओटा वडाहरू डुवानको जोखिममा परेको बेलका नगरपालिकाकी उपप्रमुख जीरा राईले बताउनु भयो ।

सप्तकोशी मुल प्रवाह नै बाँधमा ठोक्किएर साउन १७ गते दिनभर बाँध कटान गरेको थियो । साउन १८ गते ४ बजेबाट नदी बाढी गाउँमा पसेको उपप्रमुख राईले बताउनु भयो । कोशीको भङ्गालो गाउँपसेपछि गाउँ जलमग्न भएको छ ।

जसका कारण बेलका नगरपालिका–८ को सिसौली, वडा–९ को धौरी, वडा–३ को भोटेपुल, दुर्गा मन्दिर, एवीसी टप्पु, जगना, गुणीटोल र वडा–२ को लालभित्ती, बानडाँडा, चन्द्रपुर र वडा–१ को पुरन्दह, करैया, बेलहा डुबानमा पर्ने जोखिम बढेको छ ।

कोशी फुटेपछि बेलकाका स्थानीयले घर छाड्न थालेका छन् । कोशीमा पानीको सतह नघटे बेलकाको वडा–८ डुम्रीबोटस्थित कोशीको बाँध भत्किने डरले स्थानीयले साउन १७ गते अन्नपात सुरक्षित ठाउँमा सारेका छन् ।

नेपाल प्रहरीले कटानक्षेत्र नजिक टेन्ट लगाएर रातभर निगरानी गरेको छ । जोखिम क्षेत्रका स्थानीयलाई सुरक्षित स्थानमा सार्ने काम भइरहेको स्थानीय प्रेम दाहालले जानकारी दिनु भयो ।

वेलका नगरपालिका–५ र आसपासका क्षेत्रमा बाढीमा फसेकाहरूलाई उद्दारका लागि पहल थालिएको छ ।

वृद्धवृद्धा, गर्भवती, महिला तथा बालबालिकाहरूलाई सुरक्षित स्थानमा सार्न सुरू गरिएको छ । तटीय क्षेत्रका सबैलाई माइकिङ्ग गरेर सुरक्षित स्थानमा जान आग्रह गरिएको छ ।

वि.स.२०४५ सालमा अहिले कोशी फुटेकै ठाउँबाट नदी बग्ने गरेको थियो । पछि कोशी नदी पूर्वतर्फ धकेलिएका कारण पश्चिमी क्षेत्रमा बालुवा गिटी थुप्रिएर केही अग्लो डिल बनेको थियो ।

कोशी नदीमा पानीको बहाव उच्च भएपनि कोशी ब्यारेजको सुरक्षार्थ खटिएको भारतीय प्रतिनिधि मण्डलले सबै ढोका नखोल्दा सुनसरीको कोशी गाउँपालिका र बराहक्षेत्र नगरपालिकाको खेती योग्य जमिन र मानव बस्ती डुबानमा परेको छ ।

भारतले कोसी ब्यारेजका सबै ढोका नखोल्दा बाढीले कटान गर्न थालेको छ ।

सुनसरी र उदयपुरको सिमानामा रहेको सप्तकोसी नदीले चतरा पुलमुनिको ३ किलोमिटरको दुरीमा रहेको डुम्रीबोटेबाट तटबन्ध भत्काएर पश्चितमतर्फ कटान सुरू गरेपछि बेलका नगरपालिकाका स्थानीय डुवानको उच्च जोखिममा परेका छन् ।

कोशी नदीको भङ्गालो पश्चिम तटबन्दतर्फ फर्किएपछि बराहक्षेत्र र बेलका नगरपालिकाका स्थानीय त्रसिता भएका छन् ।

कोशी ब्यारेजका सबै ढोका नखोलेकाले डुम्रीबोटेबाट नदीमा आएको बाढी श्रीलङ्का टापुतर्फ प्रवेश गरेको इन्सेक उदयपुर पूर्व प्रतिनिधि सुजता ढुङ्गानाले बताउनु भयो ।

बाढीले कटान तीब्र पारेपछि सप्तकोशीको बीच भागमा पर्ने श्रीलङ्का टापुका २ हजार घर परिवार त्रासमा बस्न बाध्य भएको ढुङ्गानाको भनाइ छ ।

साउन १८ गते सप्तकोशीमा पानीको बहाव प्रतिसेकेण्ड २ लाख २९ हजार १२५ क्युसेक पुगेको सुनसरीका प्रमुख जिल्ला अधिकारी इन्द्रदेव यादवले बताउनु भयो । पानीको बहाव बढेपछि कोशी ब्यारेजका ५६ मध्ये ३२ ढोका खोलिएको प्रमुख जिल्ला अधिकारी यादवको भनाइ छ ।

photo 20220803 Udayapur (2)

photo 20220803 Udayapur (6)

photo 20220803 Udayapur (1)

  photo 20220803 Udayapur (3)

photo 20220803 Udayapur (4)

photo 20220803 Udayapur (5)

  photo 20220803 Udayapur (7)

photo 20220803 Udayapur (8)

photo 20220803 Udayapur (9)

photo 20220803 Udayapur (10)

photo 20220803 Udayapur (11)


इन्सेक प्रदेश १, कार्यालय विराटनगर