समाचारहरू

सदरमुकाम नजिकै रहेको बेनी नगरपालिका–२ खबरा क्षेत्रका ३ सय घरधुरीमा पिउने पानीको अभावले स्थानीयहरु समस्यामा परेका छन् । सदरमुकाम बेनी सँगै जोडिएको २ नम्बर वडाको  खबरा क्षेत्रमा पानीको व्यवस्थित श्रोत र वितरण हुने माध्यम नहुँदा समस्या हुने गरेको हो ।

बेनी नगरपालिका–२ लभ्लीहिलका चन्द्रबहादुर कार्कीले आफ्नो घरमा पिउने पानी ल्याउनका लागि मात्रै तीन लाख भन्दा बढी खर्चिनु परेको छ । एक घरले आफ्नो प्रयोगका लागि पानीको मुहान भएको जग्गा नै खरिद गरेर एक किलोमिटर भन्दा टाढाबाट आफ्नै लगानीमा पानी ल्याउनु परेको उहाँको भनाई छ ।

बेनी नगरपालिका–२ को मुल्छरी भन्ने ठाउँमा पानीको मुहान भए पनि त्यसलाई उचित तरिकाले ल्याउन नसक्दा समस्या भएको बेनी नगरपालिका–२ का वडा अध्यक्ष यामबहादुर क्षेत्रीले बताउनुभयो । नगरपालिका मार्फत योजना त प¥यो तर इन्जिनियरीङमै समस्या भएपछि केही धारा बने पनि पानी भने झर्दैन उहाँको भनाई छ । इन्जिनियरीङको समस्या हो वा ठेकेदारले बनाउदा अर्कै बनाए हामीलाई बुझ्न कठिन भयो तर खानेपानी योजना अलपत्र भएको उहाँले बताउनुभयो ।

त्यस्तै अर्का युवा व्यवसायी आनन्द रिजालले पनि रोटेपानी भन्ने ठाँउबाट १ हजार ५ सय मिटर पानीको पाइप टाँगेर पानी ल्याउनु भएको छ । व्यवसायीक कृषि फर्ममा लाग्नुभएका रिजालले आफूले पिउने र आफ्नो कुखुरा फर्मका लागि पाँच लाख भन्दा बढी रकम खर्चेर पाइप मार्फत पानीको व्यवस्था गर्नुभएको छ । रिजाल भन्नुहुन्छ–‘धेरै ठाउँमा ताकेता गरियो अनि धेरैलाई भनियो तर कतैबाट सुनुवाई नभएपछि सदरमुकाम नजिकै भए पनि के गर्नु आफैले लगानी गरेर पानीको व्यवस्था गर्न बाध्य भए ।’ डिपबोरीङ गरेर पिउने पानि निकाल्न सकिने सम्भावना देखिएको भए पनि उचित योजना पर्न नसक्दा ठूलो बस्तीले पानीको समस्या बेहोर्नु परेको हो । आँफैले व्यवस्था गर्न नसक्ने स्थानीयहरुको अवस्था निकै दुखद छ उहाँले बताउनुभयो ।

संघीय सरकारको विषेश अनुदान अन्तरगतको बहुवर्षीय योजना अनुरुप खानेपानीको एक घर एक धारा निर्माण थालिएको भए पनि ठेकेदारले सम्झौता अनुसार काम नगर्दा समस्या भएको बेनी नगरपालिकाका इन्जिनियर बिमल रन्जन कार्कीले बनाउनुभयो । संघीय सरकारबाट आर्थिक वर्ष २०७७÷०७८ मा ९० लाख, त्यस पछिको वर्ष ४८ लाख र चालु आर्थिक वर्षमा ९० लाख बजेट विशेष अनुदान मार्फत आएको भए पनि पहिलो वर्षकै काम सम्पन्न हुन नसक्दा पिउने पानीबाट स्थानीय वञ्चित भएको उहाँको भनाई छ ।

पानीको मुहान देखि रिजर्ब ट्याङ्की सम्मको ठेक्का लिएको हिमालयन खुसी होम जेभीले सम्झौता अनुरुप काम गरेको छैन कार्कीले भन्नुभयो । सम्झौता अनुरुप काम गर्ने सर्तमा थपिएको म्याद पनि मङ्सिर मसान्तमा सकिने भए पनि काम सम्पन्न हुने नदेखिएको उहाँको भनाई छ ।

सदरमुकाम नजिकै रहेको बस्तीमा वर्षौं देखि पिउने पानीको समस्या हुँदा पनि स्थानीय निकायले उचित ध्यान पु¥याउन नसकेको स्थानीय वासिन्दाहरुको गुनासो रहेको छ ।

अमृतप्रसाद पौडेल