समाचारहरू

जुगल गाउँपालिका–३ स्थित तेम्बाथानमा सडक यातायात नजोडिँदा त्याहाँका नागरिकहरू स्वास्थ्य सेवाबाट वञ्चित रहेका छन् । गाउँमा गाउँघर क्लिनिक छ, तर वर्षात्को समयमा हिँडेर जाने बाटो समेतको समस्या हुँदा यहाँका नागरिक स्वास्थ्य सेवाबाट वञ्चित भएका हुन् ।

वर्षायाम भन्दा अघि लगेको औषधि सकिएको र अहिले बाटोको असुविधाले औषधि लैजान मुस्किल भएकाले तेम्बाथानमा औषधिको समस्या भएको जुगल गाउँपालिका–३ का वडा अध्यक्ष लक्ष्मण दोङले बताउनु भयो ।

याहाँबाट बिरामी भएकै दिन औषधि पाइने स्वास्थ्य संस्था वा अस्पताल पुर्‍याउन नसकिने पनि वडााध्यक्ष दोङले बताउनु भयो । ‘उपचारको लागि हिँडेर जादा पनि भिरको बाटो, दुई दिन लगाएर कात्तिके बजारमा रहेको मेडिकल पुगिन्छ । बोकेर लैजान सक्ने बाटो छैन । सिकिस्त वा इमरजेन्सी बिरामी भएमा काठमाण्डौ बाट हेलिकप्टर झिकाएर लैजानुपर्ने बाध्यता रहेको छ ।’–तेम्बाथानका स्थानीय सुनलाल दोङले भन्नु भयो ।

शेर्पा र तमाङ समुदायको बसोबास रहेको यो गाउँमा सुत्केरी गराउनसमेत समस्या रहेको जुगल गाउँपालिकाकी पुर्व उपाध्यक्ष सिर्जना तमाङले बताउनु भयो । जुगल हिमालको फेदीमा रहेको तेम्बाथान गाउँमा पुग्न गाडी पुग्ने ठाउँ बोल्देबाट एक दिनको जङ्गलको उकाली बाटो छिचोल्नु पर्छ । सडकले गाउँ नजोडिएका कारण यहाँका नागरिक वर्षात्को समयमा आवतजावत गर्दैनन् ।

दुई महिनाको लागि आवश्यक पर्ने खाद्यलगायतका सामग्री वर्षायामअघि नै जोहो गर्नु पर्ने बाध्यता रहेको पूर्व उपाध्यक्ष तामाङले बताउनु भयो । गाउँबाट दुईदिन हिँडेर जुगल गाउँपालिका–४ स्थित कात्तिके बजारसम्म पुगेर दैनिक उपभोग्य सामग्री किन्नु पर्छ ।

नातिबाबु धिताल