समाचारहरू

सडक निर्माणको काम ढिलो हुँदा धुलोले समस्या पारेको भन्दै कावासोती नगरपालिका–१६, स्थित डण्डा बजार विकास एवम् व्यवस्थापन समितिले प्रमुख जिल्ला अधिकारीलाई ज्ञापनपत्र बुझाएको छ ।

नारायणगढ–बुटवल सडक निर्माणको काम सुस्त हुँदा सडक छेउछाउका व्यवसायी धुलोकै कारण विस्थापित हुनुपर्ने अवस्था आएको समितिका अध्यक्ष पदमबहादुर केसीले बताउनु भयो ।

यसैगरी निर्माणको काम लथालिङ्ग बनाएर छाडिदिँदा स्वास्थ्यमा समेत प्रतिकुल असर पारेको भन्दै निर्माणको काम छिटो सम्पन्न गराउन माग राख्दै आफूहरूले ज्ञापनपत्र बुझाएको उहाँले बताउनु भयो । अत्यधिक धुलोका कारण दैनिक कामकाज गर्न समस्या भएको अध्यक्ष केसीले बताउनु भयो ।

कात्तिक ५ गते नवलपरासी बर्दघाट सुस्ता पूर्वका प्रमुख जिल्ला अधिकारी अरुण पोख्रेललाई ध्यानाकर्षणपत्र बुझाउँदै बजार क्षेत्रमा काम छिटो सम्पन्न गराउन पहल गरिदिन अनुरोध गरेको डण्डा बजार विकास एवम् व्यवस्थापन समितिले जनायो ।

सडकको धुलोले फोक्सोको समस्या देखिन थालेको, धुलोका कारण बजार नै बन्द गर्नुपर्ने लगायत समस्या देखिएको भन्दै छिटो भन्दा छिटो डण्डा बजारको सडक कालोपत्रे गर्न जिल्ला प्रशासनमा ध्यानाकर्षणपत्र बुझाएको स्थानीय दुर्गा रिजालले बताउनु भयो  ।

विगत चार वर्षदेखि आफूहरूले सडकको धुलो खानुपरेकाले छिटो सडक निर्माण गरी आफूहरूले भोग्नु परेको सास्ती न्युनिकरण गर्न जिल्ला प्रशासनमार्फत पहल गरिदिन आग्रह गरिएको उहाँले बताउनु भयो ।

सडकको धुलो नियन्त्रणमा चासो नदिए आफुहरु सडक अवरुद्ध गर्ने देखि थप आन्दोलनका कार्यक्रममा जाने समेत उहाँले बताउनु भयो ।

ध्यानाकर्षणपत्र बुझ्दै प्रमुख जिल्ला अधिकारी पोख्रेलले आफूले सक्दो पहल गरिरहेको र सम्बन्धित पक्षसँग थप तदारुकताकासाथ छलफल गरी समस्याको समाधानमा लाग्ने बताउनु भयो ।

दयाराम आचार्य