सडक अवरूद्ध भएपछि दैनिक उपभोग्य वस्तुको अभाव

 

वर्षाका कारण नाग्मा गमगढी सडकमार्ग विभिन्न स्थानमा भत्किएपछि यातायात अवरूद्ध हुँदा जिल्लामा दैनिक उपभोग्य सामानको अभाव भएको उद्योग वाणिज्य महासङ्घ मुगुले जनाएको छ ।

असार १५ गतेदेखि लगातार परेको वर्षाले ९४ किलोमिटर नाग्मा गमगढी सडकखण्डमध्ये सबैभन्दा बढी घुच्चिलेखदेखि सदरमुकामसम्म भत्किएपछि दैनिक १५ देखि २० ओटा व्यापारीका सामान ढुवानी गर्ने मालबाहक गाडीलाई ढुवानीमा समस्या भएपछि जिल्लामा दैनिक उपभोग्य सामानको अभाव हुन थालेको हो ।

वर्षाका कारण सडक अवरूद्ध भएपछि सर्वसाधारणका लागि चाहिने दैनिक उपभोग्य सामानहरूमा चिनी, तेल, मैदा, साबुन, चाउचाउ, बिस्कुट, दाललगायतका सामानको अभाव भएको छ ।

गाँउमा किरान पसलका लागि आवश्यक सामान लिन खच्चडसहित आएका हुम्ला दार्मका केशर शाहीले बजारका प्रत्येक पसलमा जाँदा पनि खोजेको सामान नपाउँदा रित्तै खच्चड लिएर फर्किनु परेको गुनासो गरे ।

सडक अवरूद्ध भएपछि भौतिक निर्माणका सामाग्रीहरूको पनि अभाव भएको छ । वर्षाले सडक भत्काएका स्थानमा सम्बन्धित निकायले समयमा मर्मत नगरे बजारमा सबै किसिमका सामानको अभाव हुने उद्योग वाणिज्य महासङ्घका नृपेन्द्र मल्लले बताए ।

तत्काल भत्किएका स्थानको मर्मत गरी सडक सुचारू गर्न सडक डिभिजनको डोजर ताल्चामा पठाएपनि जुम्लादेखि व्यापारीले ढुवानीका गाडी नल्याउँदा सामानको अभाव भएको प्रमुख जिल्ला अधिकारी केशवराज शर्माले जानकारी दिए ।


जीवन सेजुवाल