समाचारहरू

इन्सेक पश्चिमाञ्चल क्षेत्रीय कार्यालय पोखरा र नेपाल पत्रकार महासङ्घ रूपन्देहीको संयुक्त आयोजनामा रूपन्देहीमा मिडिया साझेदारी बैठक सम्पन्न भएको छ ।

बैठकमा सहभागीहरूले देशको राजनीतिक अस्थिरताका कारणले गर्दा सञ्चारकर्मी र मानव अधिकारकर्मीहरू असुरक्षित र जोखिमपूर्ण अवस्थामा रहेको बताएका थिए ।

नेपाल पत्रकार महासङ्घ रूपन्देहीका अध्यक्ष शेरबहादुर केसीले संविधान संशोधन प्रस्ताव पश्चात मानव अधिकार रक्षकहरूले थप जोखिमपूर्ण अवस्थाको सामाना गर्नु परिरहेको बताए । केसीले मानव अधिकार रक्षकहरू एकजुट भएर मानव अधिकारको रक्षा र संरक्षणको लागि सरकारलाई दबाव दिनुपर्ने बताए ।

राष्ट्रिय मानव अधिकार आयोग उपक्षेत्रीय कार्यालय बुटवलका मानव अधिकार अधिकृत अनिज पौडेलले पश्चिमाञ्चल क्षेत्रमा घरेलु हिंसाका घटनाहरू बढी भएको बताउँदै गम्भीर प्रकृतिका मानव अधिकार हनन्का घटनाहरू नभएको बताए । उनले मानव अधिकार रक्षकहरू तटस्थ, निष्पक्ष र संयमित भएर काम गरेमा जोखिम घट्ने बताए ।

इन्सेक पश्चिमाञ्चल क्षेत्रीय कार्यालयका संयोजक शिव खकुरेलले मानव अधिकारको प्रत्याभूतिका लागि सरकार सँगसँगै मानव अधिकार रक्षकहरूको पनि विशेष भूमिका रहनुपर्ने बताए ।

महिला अधिकारकर्मी इन्दिरा आचार्यले महिला मानव अधिकारकर्मीहरू सामाजिक संरचनाका कारण थप जोखिममा रहेको बताइन् ।

कार्यक्रममा गुल्मी, अर्घाखाँची, नवलपरासी, पाल्पा र रूपन्देही जिल्लाका इन्सेक जिल्ला प्रतिनिधि र सञ्चारकर्मीहरूले जिल्लागत रूपमा मानव अधिकारको अवस्थाका बारेमा रिपोर्टिङ् गरेका थिए ।

रीमा विसी