संविधान संशोधन प्रस्तावको विरोधमा लालटिन जुलुश

  ०७३ मङ्सिर २८ गते

संविधान संशोधनको विरोधमा मङ्सिर २८ गते प्यूठानमा विरोध स्वरुप लालटिन जुलुश प्रदर्शन गरिएको छ ।

अखण्ड ५ नं. प्रदेशको माग गर्दै गरिएको आन्दोलनको दोस्रो चरणको कार्यक्रम अन्तर्गत प्यूठानको व्यापारिक केन्द्र बिजुवारबाट निकालिएको लालटिन जुलुश जुम्रीमा पुगेर कोणसभा गरी सम्पन्न गरिएको सङ्घर्ष समितिले जनाएको छ ।

कोणसभामा बोल्दै एमालेका अध्यक्ष तुल्सीराम शर्माले संविधान कार्यान्वयन प्रक्रियामा लाग्नु पर्ने कुरा थाहा हुँदापनि सरकारले संविधान संशोधनमार्फत पहाडी जिल्लाहरूलाई विभाजित गर्न योजाना भएको भन्दै यसको विरुद्धमा सबै लाग्नुपर्ने बताए ।

कार्यक्रमा माओवादी क्रान्तिकारीका सचिव टिकाराम पौडेल र मालेका सचिव धनेश्वर गौतमले संविधान संशोधन गर्ने प्रस्तावलाई बेमौसमको बाजा भनेका थिए ।

संविधान संशोधन प्रस्तावको विरोधमा गरिएको आन्दोलनमा एमाले, नेपाली काङ्ग्रेस, माओवादी केन्द्र, नेकपा माले, राष्ट्रिय जनमोर्चा, माओवादी क्रान्तिकारी र राष्ट्रिय प्रजातन्त्र पार्टीका नेता तथा कार्यकर्ताहरूको सहभागिता रहँदै आएको छ ।


रविन्द्र पाण्डे