समाचारहरू

व्यवस्थापिका-संसद्मा मङ्गलबार बेलुका दर्ता भएको संविधान संशोधनको विषयलाई लिएर पश्चिम क्षेत्रका विभिन्न जिल्ला र काठमाडौँमा गरिएको आन्दोलनका कारण जनजीवन प्रभावित भएको छ ।

सरकारले सीमाङ्कन हेरफेरसहित संविधान संशोधन प्रस्ताव संसद सचिवालयमा दर्ता गरेको विरोधमा मङ्सिर १५ गते बुटवलमा बिहानैदेखि यातायात ठप्प भएको छ ।

पाँच नम्वर प्रदेश टुक्रायाउने गरी संशोधन गर्न लागिएको भन्दै विभिन्न शिक्षण संस्थाबाट निस्किएका विद्यार्थी तथा सर्वसाधारणले बुटवलमा बिहानैदेखि चक्काजाम गरेका हुन् ।

पाँच नम्बर प्रदेशका पाल्पा, अर्घाखाँची, गुल्मी, रोल्पा र प्यूठानलगायतका पहाडी जिल्लालाई तराईबाट अलग गर्ने गरी आएको संविधान संशोधन प्रस्ताव अविलम्ब फिर्ता नहुँदासम्म आन्दोलन जारी राख्ने आन्दोलनकारीले बताएका छन् ।

बुटवलसँगै पाल्पा, गुल्मी, अर्घाखाँची, कपिलवस्तु, नवलपरासीलगायतका जिल्लामा समेत आज बिहानैदेखि विरोध प्रदर्शन भइरहेको छ ।

इन्सेक गुल्मी जिल्ला प्रतिनिधि टोपलाल अर्यालका अनुसार ५ नं प्रदेशबाट अलग्याउन लागेको बिरोधमा 'संविधान संशोधन चाँहिदैन, प्रदेश नम्बर पाँचलाई टुक्राउन पाइँदैन, भन्दै मङ्सिर १५ गतेबाट गुल्मीमा आन्दोलन सुरू भएको छ । आन्दोलनका कारण उद्योग व्यावसाय, यातायात, कार्यालयहरू तथा शिक्षण संस्थासमेत बन्द हुँदा जनजीवन प्रभावित बनेको छ ।

इन्सेक दाङ जिल्ला प्रतिनिधि जेएन सागरका अनुसार पाँच नम्बर प्रदेशलाई टुक्रायाउने प्रस्तावसहित सरकारले संसदमा दर्ता गरेको संविधान संशोधनको विरोधमा दाङमा पनि विरोधका कार्यक्रम भएका छन् ।

इन्सेक रुपन्देही जिल्ला प्रतिनिधि रिमा बिसीका अनुसार अनेरास्ववियू, अखण्ड प्रदेश नं ५ प्रदेश दबाव अभियान रुपन्देही, नेविसङ्घ, अखिल छैठौँलगायतका विद्यार्थी सङ्गठनहरूले संयुक्त रूपमा आज बिहानैदेखि प्रदर्शन गरेका थिए । प्रदर्शन एवम् चक्काजामका कारण दिनभर लामो तथा छोटा दुरीका सवारी साधनहरू सञ्चालन नहुँदा सर्वसाधारणले सास्ती व्यहोर्नुपरेको थियो ।

बन्दकर्ताले तरकारी, दुध, एम्बुलेन्स, विवाह, सञ्चार, मानव अधिकारकर्मीलगायतका सवारी साधनलाई भने निर्वाध सञ्चालन हुन दिएका थिए ।

यसैबिच इन्सेक पश्चिमाञ्चल क्षेत्रीय कार्यालयका संयोजक शिव खकुरेल नेतृत्वको टोलीले बुटवलकाे प्रदर्शन तथा बन्दको अनुगमन गरेको थियो ।

काठमाडौँमा प्रदर्शनकारीहरुले बा १ झ ८११३ नम्बरको सरकारी गाडीमा तोडफोड गरेका छन् । तेडफोडका कारण गाडीको पछाडिको सिसा फुटेको छ ।

अनलाइन डेस्क