संविधान प्रदत्त सार्वभौम अधिकारको प्रयोग गरौँः इन्सेक

  ०७९ मङ्सिर ३ गते

आवधिक रूपमा गरिने निर्वाचन अन्तर्गत भोलि मङ्सिर ४ गते हुने प्रतिनिधिसभा र प्रदेशसभाको निर्वाचनमा संविधान प्रदत्त सार्वभौम अधिकारको प्रयोग गर्न इन्सेकले अपिल गरेको छ ।

‘स्वतन्त्र, निष्पक्ष र धाँधलीरहित निर्वाचन सम्पन्न गराउनु निर्वाचन आयोगको दायित्व हो भने आफूलाई मन परेको उम्मेदवार छान्न पाउनु जनताको नैसर्गिक अधिकार हो । त्रास,धम्की,प्रलोभनमा नपरी मतदानमा सहभागी हुन हामी अपिल गर्दछौँ ।’–इन्सेककी अध्यक्ष डा. इन्दिरा श्रेष्ठद्वारा मङ्सिर ३ गते जारी विज्ञप्तिमा उल्लेख छ ।

नेपालको संविधानमा नेपालको सार्वभौमसत्ता एवं राजकीय सत्ता नेपाली जनतामा निहित हुने व्यवस्था रहेको इन्सेकले जारी गरेको अपिलमा उल्लेख छ ।

अपिलमा भनिएको छ–‘आवधिक निर्वाचन आफैँमा त्यो अवसर हो, जसमार्फत् नागरिकले राज्य सञ्चालनलाई निर्देशित गर्छन् । आफ्ना लागि नीति बनाउने र त्यसको कार्यान्वयनमार्फत् आफ्नो जीवनस्तर सुधार्न पहल गर्ने प्रतिनिधि चुनेर पठाउँछन् ।’


अनलाइन डेस्क