समाचारहरू

प्रदेश ४ का मुख्यमन्त्री पृथ्वीसुब्बा गुरुङले महिला स्वयम् आफ्नो हक र अधिकारका लागि नबोल्दासम्म संविधानमा लेखिएका अक्षरले मात्रै समानता नल्याउने बताएका छन् । उनले संविधानमा लेखिएका विषयलाई अक्षरस कार्यान्वयन गर्नुपर्नेमा जोड दिएका छन् ।

'सङ्घीय लोकतान्त्रिक गणतन्त्र नेपालको मुल आधार महिलाको आफ्नो शरीर, श्रम र पहिचानमा आफ्नो अधिकार' भन्ने नारासहित महिला मानव अधिकार रक्षक सञ्जाल र पोखरा-लेखनाथ महानगरपालिकाको संयुक्त आयोजनामा चैत ५ गतेदेखि पोखरामा आयोजित कार्यक्रमको उद्घाटनका अवसरमा बोल्दै मुख्यमन्त्री गुरुङले सो कुरा बताएका हुन् ।

मुख्यमन्त्री गुरुङले समाजलाई परिवर्तन गर्नु छ भने सुरूवात आफैँबाट गर्न आवश्यक रहेको बताउँदै देशका ५२ प्रतिशत महिलाको समृद्धि बिना देश विकास असम्भव रहेको उल्लेख गरे ।

चैत ७ गतेसम्म चल्ने कार्यक्रममा हानिकारक परम्परागत अभ्यासहरू, पुनर्निर्माण र सुरक्षित रोजगार, महिलाको उत्पादन, पहुँच र नियन्त्रण वर्तमान स्थिति, न्यायमा महिलाको पहुँच, समस्या, चुनौति र समाधानका उपायलगायतका विषयमा छलफल गरिने कार्यक्रमकी संयोजक सरलाकुमारी पाण्डेले बताइन् ।

कार्यक्रममा प्रदेश ४ का स्थानीय तथा प्रदेश सभाका जनप्रतिनिधिहरू, महिला मानव अधिकार रक्षकलगायत ३ सय बढी प्रतिनिधिहरूको सहभागिता रहेको आयोजकले जनाएको छ ।

सङ्गीता भाट