समाचारहरू

संरक्षणको अभावमा खप्तड छेडेदह गाउँपालिका–४ खातीगाउँका १२ वर्षीय लक्ष्मण धामी र उनकी आठ वर्षीया बहिनी विपना धामी विगत दुई महिनादेखि बिचल्लीमा परेका छन् ।

बुवाको करेण्ट लागेर मुत्यु भएको र आमाले दोस्रो विवाह गरेर गएपछि यी दुई बालबालिकाहरु बिचल्लीमा परेका हुन् ।

पीडित बालबालिकाका बुवा जीतबाहदुर धामीको दुई वर्ष आगडि भारतको पिथौडागड्मा करेण्ट लागेर मृत्यु भएको र आमा रामकला धामीले दुई महिना आगडि दोस्रो विवाह गरेर गएपछि लक्ष्मण र विपना बिचल्लीमा परेका स्थानीय चन्द्र धामीले इन्सेक जिल्ला प्रतिनिधिलाई फोनमार्फत जानकारी दिनुभयो ।

संरक्षण गर्ने परिवारका सदस्यहरु नभएपछि हाल दुबै दाजुबहिनी आफन्तको घरमा गाउँलेको सहयोगमा बसिरहेका भए पनि उनीहरुलाई दैनिक खानलगाउन समस्या उत्पन्न भएको स्थानीय राजेन्द्र धामीले बताउनु भयो ।

गाउँ नजिकै रहेको खापरदेवस्थी माविमा अध्ययनरत दुबै दाजुबहिनी बुवाको मृत्यु र आमाले दोस्रो विवाह गरेर गएदेखि विद्यालय जान छोडेको र उनीहरुसँग कापी, कलम र विद्यालय पोषाक किन्न पैशा समेत नएको उहाँले बताउनु भयो ।

आमाले दोस्रो विवाह गरेर गएदेखि आफूहरु बिचल्लीमा परेको र विद्यालय जाने रहर हुँदाहुँदै पनि विद्यालय पोषाक, कपी र कलम समेत किन्नलाई रकम नभएपछि विद्याललय जोडनु पर्ने बाध्यता भएको पीडित लक्ष्मण धामीले दुखेसो पोख्नु भयो । हाल आफू र बहिनीलाई विहान बेलुकीको खानाको जोहो गर्न नै मुस्किल परेको उहाँले बताउनु भयो ।

बुवाको मृत्युपछि पनि दुवै दाजुबहिनी स्कुल पढ्दै गरेको भए पनि आमाले दोस्रो विवाह गरेर गएदेखि उनीहरुको पालनपोषणमा समस्या देखिएको खप्तड छेडेदह गाउँपालिका ४ का वडाध्यक्ष दलबहादुर धामीले बताउनु भयो ।

पीडित बालबालिकाहरुको पालनपोषण गर्न तथा विद्यालय जाने वातावरण बनाउन वडा कार्यालय र गाउँ कार्यपालिकको वैठकमा पहल गरिरहेको उहाँले बताउनु भयो ।

पदमबहादुर सिंह