समाचारहरू

अदानचुली गाउँपालिका–२ स्थित श्रीनगरका स्थानीय नागरिक महङ्गो मुल्यमा चामल खरिद गर्न बाध्य भएका छन् । श्रीनगर डिपोमा चामलको अभाव भएपछि सो ठाउँका स्थानीय नागरिक बजारमा पाइने चामललाई महङगो मुल्य तिररे खान बाध्य भएका हुन् ।

गत पुस १ गते खाद्य डिपो श्रीनगरले स्थानीय नागरिकलाई अनुदानको खाद्यान्न बिक्री गरेको भए पनि बिक्री गरेको दुई घण्टामै डिपोमा खाद्यान्न अभाव भएपछि अधिकांश सेवाग्राहीले चामल नपाएरै घर फर्कनु परेको स्थानीय परबहादुर थापाले गुनासो गर्नु भएको छ ।

उहाँका अनुसार डिपो कार्यालयमा खाद्यान्न न्युन भएको र केही स्थानीयलाई मात्रै बिक्री गर्न पुगेको भए पनि वडा नम्वर २ का करिव तीन सय भन्दा बढि घरधुरीले नेपाल सरकारले अनुदानमा दिदै आएको खाद्यान्नबाट बन्चित भएका छन् ।

दैनिक जसो स्थानीयहरू चामल खोज्दै डिपोमा पुग्ने गरे पनि रित्तो हात फर्कनु परेको थापाको भनाई छ । डिपोमा अरुवा मध्यम चामलको ३० किलो प्रति बोराको १ हजार ८ सय ५० रुपियाँ पर्ने भए पनि बजारमा २ हजार ७ सय ५० रुपियाँ महङ्गो मुल्यमा किनेर खान बाध्य भएको स्थानीय कुम्मेर बुढाले गुनासो गर्नु भएको छ ।

उहाँले भन्नु भयो “डिपोमा खाद्यान्न अभाव भएपछि श्रीनगर बजारबाट महङ्गो मुल्य तिर्नु परेको छ ।” यस अघि गत असोजमा परेको अबिरल वर्षाले बाटो अवरोधका कारण दशैँ अगाडी चामल आयत हुन सकेको थिएन । श्रीनगर डिपोमा आएको चामल मङसिर महिनामा बिक्री भएपछि सबै सकिएको श्रीनगर डिपो केन्द्रका कर्मचारी टसी फडेराले बताउनु भएको छ ।

डिपो केन्द्रका कर्मचारी फडेराका अनुसार एक पटकमा ३ सय २० बोरा ३० केजीको चामल आएको थियो भने दोस्रो पटक ३ सय १७ बोरा आए पनि सबै बिक्री भई सकेकाले हाल डिपो कार्यालय खाली रहेको छ ।

डिपो कार्यालयका लागि १ हजार क्वीन्टल आयत हुनुपर्नेमा बाँकी चामल बाटो अवरोध भएपछि रोकिएको नेपाल खाद्य व्यवस्था तथा व्यापार कम्पनी लिमिटेड शाखा कार्यालयका कार्यालय प्रमुख कृष्णप्रसाद अधिकारीले बताउनु भएको छ । कार्यालय प्रमुख अधिकारीका अनुसार गत असोजमा परेको अविरल वर्षाले गर्दा बाटो अवरुद्ध भएकाले खाद्यान्नमा ढिलाइ भएको हो ।

नन्द सिंह