समाचारहरू

नेपालको संविधान २०७२ को धारा ३४ मा श्रमको हक सम्बन्धी व्यवस्था गरिएको छ । सोही धाराको उपधारा १ मा पारिश्रमिक लिई रोजगारदाताका लागि शारीरिक वा बौद्धिक कार्य गर्नेलाई कामदार वा मजदूर सम्झुन पर्छ भनि श्रमिकको परिभाषा गरिएको छ ।

तर, धनकुटा नगरपालिका–१० मार्गामा रहेको जनकल्याण माध्यमिक विद्यालयमा पढाए बापतको पारिश्रमिक नपाएको शिक्षिका सिर्जना भट्टराईले गुनासो गर्नु भएको छ ।

जनकल्याण माविबाट ०७९ वैशाखदेखि असार समान्तसम्मको तलब ९० हजार ८ सय ६० रुपियाँमध्ये ५० हजार रुपियाँ पारिश्रमिक नपाएको शिक्षिका भट्टराईको गुनासो छ ।
विद्यालयमा श्रम गरेका बापतको रकममध्ये ४० हजार ८ सय ६० रुपियाँ मात्र पाएको शिक्षिका भट्टराईले बताउनु भएको छ ।
जनकल्याण माविमा ०७६ साल कात्तिक ८ गते निम्न माध्यमिक तहमा तृतीय श्रेणी विज्ञान विषयमा नियुक्त भएर श्रम गरेको बापतको रकम नपाएको शिक्षिका भट्टराईको गुनासो छ ।
धनकुटाबाट मोरङ्गमा रहेको सरस्वती माविमा ०७९ असार २४ गते सरुवा भएपनि जनकल्याण माविमा श्रम गरेर पकाएको तलबमध्ये ५० हजार रुपियाँ पाउन नसकेको शिक्षिका भट्टराईले बताउनु भयो ।
जनकल्याण माविमा ०७९ वैशाखदेखि असार मसान्तसम्मको तलब ९० हजार ८ सय ६० रुपियाँमध्ये ४० हजार ८ सय ६० रुपियाँ मात्र बैङ्क खातामार्फत पाएको शिक्षिका भट्टराईले बताउनु भयो ।
जनकल्याणमा श्रम गरेको बापतको बाँकी तलब भुक्तानीका लागि ०७९ साउन २३ गते विद्यालयमा निवेदन दिएको भएपनि ०८० जेठ २२ गतेसम्म तलब नपाएको शिक्षिका सिर्जना भट्टराईले इन्सेककर्मीसँग बताउनु भयो ।
जनकल्याण माविमा पारिश्रमिकका लागि निवेदन दिएको भएपनि विद्यालय आँफैले विद्यालयलाई सहयोग भन्दै ५० हजार रुपियाँ राखेको शिक्षिका भट्टराईले बताउनु भयो ।
धनकुटा नगरपालिकाको न्यायिक समिति संयोजक भीमा खनाललाई पारिश्रमिक दिलाउन माग गर्दै ०७९ कात्तिक २७ गते धनकुटा नगरपालिकाको न्यायिक समितिमा निवेदन दिएको भएपनि कारबाही नभएको शिक्षिका भट्टराईले गुनासो गर्नु भयो ।
शिक्षिकाले पकाएको पारिश्रमिक नदिएको विषयमा जनकल्याण माविका प्रधानाध्यापक चिरञ्जीवी दाहालले उहाँ सरुवा भएदेखि विद्यालय नआएकाले समस्या भएको बताउनु भयो । उहाँले पहिले सरुवा लिनका लागि विद्यालयलाई रकम सहयोग गर्ने भनेको र पछि त्यति रकम सहयोग गर्न नसक्ने बताउनु भएको प्रअ दाहालले बताउनु भयो । शिक्षक व्यवस्थापनमा लागेको खर्च चन्दादाता रुपमा राख्न लागेको प्रअ दाहालले बताउनु भयो ।
शिक्षिका सिर्जना भट्टराईले विद्यालयले सरुवा भएर रिक्त स्थानमा पदपूर्तिका लागि केही रकम मागेको र सोही अनुसार आफूले सहयोग गर्ने भनेको, तर विद्यालयले पदपूर्तिका लागि विज्ञापन नगरी आफ्नो स्थानमा सरुवा शिक्षक नै ल्याएपछि आफूले रकम दिन नसक्ने भट्टराईले बताउनु भयो ।
धनकुटा नगरपालिका न्यायिक समिति संयोजक भीमा खनालले दुवै पक्षलाई सम्पर्क गरेर समस्या समाधानको लागि पहल गर्ने बताउनु भएको छ ।

ईश्वर थापा