शैक्षिक सत्र सुरु भए पनि विद्यार्थीले पाठ्यपुस्तक पाएनन्

 

जिल्लाका सामुदायिक तथा संस्थागत विद्यालयले नयाँ शैक्षिक सत्र सुरु भएसँगै जेठ १ गतेदेखि नियमित कक्षा सञ्चालन गरेका छन् । तर सामुदायिक विद्यालयका विद्यार्थीले भने अझै पाठ्यपुस्तक पाएका छैनन् ।

वैशाखभित्र नयाँ भर्ना अभियान सकेर जेठ १ गतेदेखि पठनपाठन सुरु गरेका विद्यालयले कक्षा ४ देखि १० सम्मका विद्यार्थीलाई पुस्तक उपलब्ध गराउन सकेका छैनन् ।

जिल्लामा ३ सय ४२ ओटा सामुदायिक र २३ ओटा संस्थागत विद्यालय रहेका छन् । ती सबै विद्यालयले कक्षा १ देखि ३ कक्षासम्म भने निजी विद्यालयमा पठनपाठन हुने पुस्तक पढाउने गरेका छन् ।

त्योबाहेक माथिल्लो कक्षाका विद्यार्थीका हातमा पुस्तक उपलब्ध गराउन नसकिएको विद्यालयहरूले जनाएका छन् ।

सरकारले जनक शिक्षा पाठ्यपुस्तक उत्पादन केन्द्रमार्फत सबै जिल्लामा पुस्तक पठाउने गरेको छ ।

तर यस पटक दोलखामा अझैसम्म पनि पुस्तक आउन नसकेको दोलखाका पुस्तक व्यवसायी एवम् आचार्य बुक्स एन्ड स्टेसनरी सञ्चालक सकुन्तला आचार्यले बताउनु भयो ।

उहाँको पसलमा अहिले पुस्तक आए नआएको सोध्ने विद्यालयका शिक्षक तथा विद्यार्थीको भिड नै लाग्ने गरेको छ ।

सरकारले समयमै पुस्तक छापेर जिल्लामा ढुवानी नगर्दा पसल नै बन्द गरेर बस्नुपर्ने अवस्था आएको उहाँको भनाइ छ ।

जनक शिक्षा सामग्री सेन्टरले दोलखाको लागि जेठ ९ र ११ गते पुस्तक पठाउने पत्रमार्फत जानकारी दिए पनि ९ गते पुस्तक पठाउन नसकेको चरीकोट बजारकै अर्का पुस्तक व्यवसायी शिवहरि थापाले बताउनु भयो ।

उहाँले प्राइभेट कम्पनीले छापेको र सामुदायिक विद्यालयका कक्षा १, ३ र ५ को किताब विद्यालयलाई दिए पनि कक्षा २, ४, ६, ७, ८, ९ र १० कक्षाका विद्यार्थीलाई पाठ्यपुस्तक दिन नसकेको बताउनु भयो ।

जेठ १ गतेदेखि नयाँ शैक्षिक सत्र सुरु गर्न निर्देशन दिएको सरकारले जिल्लामा पाठ्यपुस्तक छपाएर पठाउन भने नसकेको उहाले गुनासो गर्नु भयो ।

शिक्षा विकास तथा समन्वय दोलखाका इकाइ प्रमुख शंकरबाबु श्रेष्ठले भने जनक शिक्षा सामग्री केन्द्रले नयाँ शैक्षिक सत्र ०७९ मा परिवर्तन भएको कक्षा ४, ७ र ९ पाठ्यक्रमलाई पनि एकैसाथ छापेर ढुवानी गर्ने भएकाले जिल्लामा पाठ्यपुस्तक आउन ढिलाइ भएको बताउनु भयो ।

कक्षा सञ्चालन भएपछि पनि पुस्तक नहुँदा समस्या परेको कालिढुङ्गा माध्यामिक विद्यालय मिर्गेका प्राध्यानध्यापक पुष्करकुमार दाहालले बताउनु भयो ।

जिल्लामा पाठ्यपुस्तक नआएको कारण विद्यालयको पठनपाठन नै प्रभावित बनेको छ ।


उद्धव पोखरेल