शैक्षिक सत्र सुरु भएको चार महिनासम्म पाठ्यपुस्तक नपाएको विद्यार्थीको गुनासो

चन्दननाथ गुरुकल पाठशालाका बालबालिकालले शैक्षिक सत्र सुरु भएको चार महिना बितिसक्दा पनि पाठ्यपुस्तक नपाएको गुनासो गरेका छन् ।

उक्त गुरुकुल पाठशालाका प्रधानाध्यापक विश्वराज उपाध्यायले शैक्षिक सत्र सुरु भएको पहिलो हप्तामा पाठ्यपुस्तकका लागि माग गरिएको भएपनि जेठ १९ गतेसम्म प्राप्त नभएको बताए । उनले भने-'पाठ्यपुस्तक नभएपछि पठनपाठनमा समस्या भएको छ । यस विषयमा पटकपटक जिल्ला शिक्षा कार्यालय जुम्लासँग अनुरोध गर्दा सुनुवाइ भएको छैन ।'

प्रधानाध्यापक उपाध्यायले भने-'अहिले गुरुकुल पाठशालामा कक्षा तीनसम्म पठनपाठन भइरहेको छ । दुई कक्षासम्मका बालबालिकाले पुराना पाठ्यपुस्तक अध्ययन गरिरहेका छन् तर कक्षा तीनका बालबालिकाले भने पाठ्यपुस्तक नपाएर पठनपाठनमा समस्या भइरहेको छ ।'

कर्णालीमा फागुन महिनादेखि शैक्षिक सत्र सुरु हुने गरेपनि आधा जेठ महिना बितिसक्दा पनि पाठ्यपुस्तक बालबालिकाले प्राप्त गर्न नसकेका हुन् ।

चन्दननाथ गुरुकुल पाठशालामा अहिले १५ जना छात्रा र २५ जना छात्र गरी ४० जना बालबालिका अध्ययन गरिरहेका छन् । उक्त पाठशालामा गुरुकुल सामाजिक, संस्कृत रचना, संस्कृत भाषा, गुरुकुल नेपाली विषय पठनपाठन भइरहेको छ ।

जिल्ला शिक्षा अधिकारी कुलबहादुर फडेराले जिल्लाले पाठ्यपुस्तक माग गरेपनि केन्द्रबाट समयमा प्राप्त नभएको बताए । यस समस्या समाधानका लागि छिट्टै व्यवस्थापन गर्ने जिशिअ फडेराले प्रतिबद्धता जनाए ।


मानदत्त रावल