शैक्षिक सत्र सुरु भएको एक महिनासम्म विद्यालयमा पाठ्य पुस्तक पुगेन

  ०७९ जेठ ३० गते

शैक्षिक सत्र सुरु भएको एक महिना बितिसक्दा पनि हुम्लाका दुई वटा गाउँपालिकाका विद्यालयमा पाठ्य पुस्तक पुग्न सकेका छैनन । हालसम्म पनि पाठ्य पुस्तक नपुगेको गाउँपालिकामा सिमकोट र नाम्खा रहेका छन् । शैक्षिक सत्र सुरू भएको एक महिना बितिसक्दा पनि विद्यार्थीले पाठ्य पुस्तक नपाएको गुनासो गर्दै आएका छन् ।

विद्यालयमा पाठ्य पुस्तक नपुग्दा यो वर्ष पनि कोर्ष पुरा नहुने कैलाश माविका छात्रा रमिता शाहीले गुनासो गर्नु भयो । विद्यालयमा पठ्य पुस्तक अभावका कारण शिक्षक र शिक्षिकाले मौखिक रुपमा अध्ययन गरी रहेको छात्रा शाहीले गुनासो गर्नु भयो ।

हुम्लाका पाँचवटा गाउँपालिका मध्य खार्पुनाथ, सर्केगाड, चंखेली, अदानचुली र ताँजाकोटका विद्यार्थीहरूले हातहातमा पुस्तक पाएको भए पनि माथिल्लो भेग क्षेत्रमा पुस्तक आइ नपुगेको शिक्षा विकास तथा समन्वय इकाइका प्रमुख तिलक भट्टराईले बताउनु भयो ।

खार्पुनाथ भन्दा तलका गाउँपालिकामा ढुवानी सहज हुने भएपछि सजिलै पुस्तक पुगेका छन् । जसमा खार्पुनाथका लागि पैदलमार्गबाट रोकाया पुस्तक पसलले ढुवानीको जिम्मा लिएको थियो । चङ्खेली र सर्केगार्ड गाउँपालिकाका ५९ वटा विद्यालयका लागि पुस्तक ढुवानीको जिम्मा पाएको मानदेवी पुस्तक पसलका प्रतिनिधि मानदेश शाहीले तीन हजार १ सय ५ सेट पुस्तक गाउँपालिकामा पु¥याएर वितरण तयारी भइरहेको जानकारी दिनु भयो ।

उहाँले भन्नु भयो जनक शिक्षा सामग्री केन्द्र लिमिटेडको प्रदेश कार्यालय, सुर्खेतबाट बुझेर पैदल ढुवानी गरिएको हो । अदानचुली र ताँजाकोटका ३६ वटा विद्यालयका लागि पुस्तक ढुवानीको जिम्मा पाएको एलबी सप्लायर्सका प्रतिनिधि लोकेन्द्र भण्डारीले २ हजार थान पुस्तक लिमिटेडको नेपालगञ्ज कार्यालयबाट बुझेर गाउँपालिकामा पु¥याइसकेको र विद्यालयलाई खबर भइसकेकाले एक–दुई दिनमा वितरण गरिने बताइएको छ ।

उत्तरी क्षेत्रका सिमकोट र नाम्खा गाउँपालिकाका कुनै पनि विद्यालयमा पुस्तक पुगेको छैन । यी गाउँपालिकाको पुस्तक ढुवानीको जिम्मा पाएको रोकाया पुस्तक पसलका प्रतिनिधि ज्ञानबहादुर रोकायाले पैदलमार्गबाट सर्केगार्डमा आइपुगेको र त्यताबाट खच्चडमा ढुवानी गर्ने तयारी भइरहेको जानकारी दिनु भयो ।

हुम्ला जिल्लामा कक्षा एकदेखि दशसम्म १६ हजार १ सय ४७ जना विद्यार्थी सङ्ख्या रहेको इकाइको विवरणमा उल्लेख छ । लिमिटेडको प्रादेशिक कार्यालय, सुर्खेतका प्रमुख धनबहादुर केसीले सामाजिक विकास मन्त्रालयको विवरणका आधारमा भन्दा पनि सम्वन्धित गाउँपालिकाले गरेको सिफारिसका आधारमा हुम्लाका लागि पुस्तक सेट पठाइएको जानकारी दिनु भयो ।

प्रमुख केसीले हिमाली जिल्ला भएको र ढुवानी समस्या हुने भएका कारण हुम्ला जिल्लालाई पुस्तक वितरणमा पहिलो प्राथमिकतामा राखिएको जानकारी दिनु भयो । हुम्लामा पुस्तक ढुवानीको जिम्मा पाएका तीनवटै सप्लायर्सहरूले कक्षा एकदेखि तीनसम्मका पुस्तक भने निजी क्षेत्रले उपलब्ध नगराएका कारण ल्याउन नसकिएको जनाएका छन् ।

हालसम्म पनि विद्यालयमा पाठ्य पुस्तक नपुगेपछि विद्यार्थीहरूको पठनपाठनमा प्रभावित भएको विद्यार्थीले गुनासो गरेका छन् ।


नन्द सिंह